Link açıqlığı

Saatnıñ esas haberi

Aqmescitte mahkeme «Fevral 26 işi» figurantı Arsen Yunusovnı sorğuladı


2014 senesi fevralniñ 26-nda Qırım Yuqarı Radasınıñ binası ögünde yapılğan Ukrainanıñ topraq bütünligine qol tutuv mitingi boyunca «iş»niñ figurantlarından biri Arsen Yunusov Kremlniñ kontroli altında bulunğan Aqmescitteki Merkeziy rayon mahkemesinde sorğulandı.

Bunı dekabrniñ 14-nde Qırım.Aqiqat bildire.

Yunusov, miting aqqında malümatnı içtimaiy ağlardan ögrenip, oña öz isteginen kelgenini ve «iş» boyunca qabaatlanğanlardan yalıñız Eskender Emirvaliyev ile tanış olğanını söyledi. Ondan ğayrı o, Qırımtatar Milliy Meclisine alâqası olmağanını qayd etti.

Yunusov: «Men mitingge Ukrainanıñ topraq bütünligine qol tutmaq içün keldim. «Rus birligi»niñ tarafdarları Rusiyege qoşulmaqnı istey edi, biz – Ukrainanı istey edik. Areketlerimni kimse idare etmedi. Men bir kişini urğanım epizodına kelgende ise, o, adamlarnı çıqarmaq içün koridornı yasamağa keder ete edi, işte men de onı bu sebepten urdım. Ondan soñ meni «özümizniñkiler» çetke çektiler», – dedi.

Bundan soñ prokuror, tahqiqatçı tarafından Yunusovnıñ sorğulanması protokolınıñ ilân etilmesini soradı.

İşniñ beş figurantı ve advokatlarınıñ itirazlarına baqmadan akem, Yunusovnıñ tahqiqatçığa yapqan itiraflarınıñ oqulmasına dair qarar berdi.

Yunusov, bu itiraflarnı yalıñız qısmen tanığanını ve kütleviy qarışıqlıqlarda iştirak etkeni ile olar birisi tarafından teşkil etilgeni aqqında sözlerinden vazgeçkenini söyledi.

Dekabrniñ 12-sinde Aqmescitte mahkeme, 2014 senesi fevralniñ 26-sında Qırım Yuqarı Radasınıñ binası ögünde yapılğan Ukrainanıñ topraq bütünligine qol tutuv mitingi boyunca «iş»niñ figurantlarından daa biri olğan Eskender Kantemirovnı sorğuladı.

2015 senesinde bir grup qırımtatar faaliyetçilerge qarşı 2014 senesi fevralniñ 26-sında Qırım Yuqarı Radası binasınıñ divarları yanında Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün mahkeme başlandı. Olarnı kütleviy qarışıqlıqlarda iştirak etkenlerinde qabaatlaylar.

Daa soñra mahkeme «Fevral 26 işi»ni ekige ayırdı: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.

Rusiye akimiyeti oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umeriv ve Çiygoz Kyivge keldiler.

XS
SM
MD
LG