Rusiyedeki «Artdokfest» festivalinde sebebi añlatılmayıp kösterilüvden alıp taşlanğan qırımtatar milliy areketi lideri Mustafa Cemilev aqqında «Mustafa» vesiqalı filmi açıq irişüvge qoyuldı. Bunı Ukrainanıñ «KrımSOS» aq-uquq qoruyıcı teşkilâtı bildire.
«Mustafa» filmi dekabrniñ 7-sinde Moskvadaki «Oktâbr» kinoteatrinde «Artdokfest» vesiqalı filmler festivali çerçivesinde kösterilmek kerek edi. Lâkin seansqa eki saat qalğanda «töpeden» telefon çalınıp, film kösterilüvden alıp taşlandı.
Rejissör Ahmed-Ernes Sarıhalilniñ aytqanına köre, film muellifleri, Rusiyede elverişsiz olğan qırımtatarlar, dissidentler mevzuatından dolayı filmniñ kösterilüvi ile zorluqlar olacağını tüşüne ediler. Filmniñ yaratıcıları peyda olğan vaziyette filmni bütün istegenlerge – em Moskvada filmge qol tutmaq içün kelgenlerge, em qırımtatarlarğa, em de böyle bir imkânğa saip olmağan Rusiye tarafından ilhaq etilgen Qırımnıñ sakinlerine köstermege qarar berdiler.
«Mustafa» filmi YouTube’de «Artdokfest»niñ saytında yerleştirilgen.
«Mustafa» filmi seyircige Ukraina siyasetçisi ve cemiyet erbabınıñ ayatı, sovet akimiyeti zamanında qırımtatarlarnıñ Qırımğa qaytuvı oğrundaki küreşi, apis etilüvi ve açlıq tutqan zamanı aqqında ikâye ete. Film qırımtatar milliy lideriniñ harakterini añlata, Cemilevniñ ayatında şimdiki dönemi ve Qırımnıñ işğaline qarşı küreşini köstere. Ayatınıñ ikâyesini qaramannıñ özü, tarihçılar, Cemilevniñ eñ yaqın etrafındakileri ve Sovet Birliginiñ dissidentleri aytıp berdiler. Rejissör Ahmed Sarıhalil em oyun kadrları – qırımtatar lideriniñ hatırlavlarından ayrı anlarnı, em de intervyu parçaları, vesiqalı hronikalarnı qullandı.
