Ukrainanıñ topraq bütünligi tiklenilmegence Rusiyege qarşı sanktsiyalar devam etecek. Bunı dekabrniñ 13-nde Vaşingtonda Atlantika şurası forumında AQŞ Devlet kâtibi Reks Tillerson söyledi.
Onıñ aytqanına köre, bugün eñ emiyetli olğan Donbasstaki çatışma meselesidir, lâkin Qırım meselesiniñ al etilmesi içün de vaqıt kelecek.
Tillerson: «Biz Qırım meselesine qaytacaqmız. Prezident Putin açıq bir şekilde onıñ muzakere masası başında qonuşılmaycağını söyledi. Bir an kelir, qonuşılacaqtır, lâkin şimdi biz Ukrainanıñ şarqındaki zorbalıqnı toqtatmaq kerekmiz. Bunı al ete bilecekmizmi, baqayıq», – dedi.
Halqara teşkilâtları, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri oña qarşı bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
