BMT yanındaki Ukraina temsilciligine bildirilgeni kibi, dekabrniñ 19-nda BMT Baş assambleyası, Ukraina tarafından taqdim etilgen Qırımda insan aqları boyunca qarar leyhası içün rey berecektir.
Temsilcilikniñ Twitterdeki bildirüvinde: «BMT Baş assambleyasında Ukraina tarafından azırlanğan «Qırım Muhtar Cumhuriyeti ve Aqyar şeerinde insan aqları saasındaki vaziyet» qarar leyhası içün rey berilüvi dekabrniñ 19-nda yapılacaqtır», – denile.
Noyabrniñ 14-nde Nyü-Yorkta BMT Baş assambleyası Üçünci komitetiniñ oturışuvında ilhaq etilgen Qırımda insan aqları boyunca qararınıñ yañartılğan leyhası qabul etildi.
Rey berüvniñ neticesinde 71 ülke vesiqanıñ qabul etilmesi içün ve 25 ülke buña qarşı rey berdi; 77 ülke rey berüvden vazgeçti. Beyazrusiye, Venesuela, Şimaliy Koreya ve diger ülkeler qarşı rey berdiler.
2017 senesiniñ oktâbr ayında Ukraina, Qırımda insan aqları boyunca qararınıñ yañartılğan leyhasını BMT Baş assambleyasınıñ Üçünci komitetine teslim etti. Vesiqada Rusiyeden, BMT Halqara mahkemesiniñ Qırımda Qırımtatar Milliy Meclisiniñ yasaq etilmesini lâğu etüv ve yarımadada qırımtatar ve ukrain tillerinde tasil almaqnı temin etüv boyunca tevsiyelerniñ muvaqqat tedbirlerini yerine ketirmek kerekligi talap etile.
