Dekabrniñ 12-sinde Qırımda Kremlniñ kontroli altında bulunğan Ekstremizmge qarşı küreşüv merkezinde («E» merkezinde) qırımtatar faaliyetçisi Seytumer Seytumerovğa, ondan noyabrniñ 8-nde tintüv vaqtında tutıp alınğan telefon qaytarıldı. Bunı o Qırım.Aqiqat muhbirine söyledi.
Aynı vaqıtta tutıp alınğan noutbuk telükesizlik hadimlerinde qaldı. Seytumerovğa añlatqanları kibi, onıñnen «mutehassıslar çalışa».
«E» merkezinde faaliyetçini noutbuktaki malümat, «Qırım birdemligi» ve Qırımda oktâbrniñ 14-nde yapılğan bir kişilik piketler aqqında soraştırdılar.
«Noutbukımda olar «Qırım birdemligi»nden alınğan bazı videomateriallar ile bir kişilik piketlerde çıqarılğan resimlerni taptılar. Bu videolar noutbukıma nasıl kelip tüşti, «Qırım birdemligi»ne ne alâqam bar, Qırımda oktâbrniñ 14-nde yapılğan bir kişilik piketler aqqında neler bilem, olarnıñ teşkilâtçılarını tanıyımmı, dep soraştırdılar. Ondan ğayrı, (oktâbrniñ 11-nde yaqalanğan ve Rusiye Cinaiy kodeksiniñ 205.5 maddesi boyunca qabaatlanğan – QA) Seyran Saliyev aqqında neler bilem, maña nasıldır kitaplar ve malzemelerni berdimi, dep soradılar», – dedi faaliyetçi.
Seytumerovnıñ aytqanına köre, o, Rusiye anayasasınıñ 51-nci maddesine esaslanıp, bir şeyler demekten vazgeçti. Faaliyetçi evinde yapılğan tintüvni, üstüne yazılğan cöremeni ve «E» merkezine çağırılğanını Qırımda vatandaş cemiyetine qarşı tazyıq dep saya.
Seytumerov: «Bunıñ kibi işler, Qırım faaliyetçileri ve Qırımda olıp keçken vaqialar aqqında yazğan vatandaş jurnalistlerge qarşı yapılğan tazyıqnen alâqalıdırlar. Lâkin bütün tazyıqlarğa baqmadan, qırımtatarlar devlet tarafından vaad etilgen aqlar içün bundan evel olğanı kibi şimdide de yalıñız barışıq tarzda küreşecekler», – dep ilâve etti.
Dekabrniñ 13-nde Kremlniñ kontroli altında bulunğan Qırım Yuqarı mahkemesi qırımtatar faaliyetçisi Seytumer Seytumerovnıñ appelâtsiya şikâyetini onsız baqıp çıqtı.
Noyabrniñ 8-nde ilhaq etilgen Qırımnıñ Bağçasaray ve Eski Qırım şeerleri ile Aqmescit rayonınıñ Şumhay (Zareçnoye) qasabasında qırımtatar faaliyetçileri ve cemaatçılarınıñ evlerinde tintüvler yapıldı. «Qırım birdemligi»niñ malümatına köre, tintüvler Seytumer Seytumerov (Bağçasaray), Alimdar Belâlov (Eski Qırım) ve Eldar Kantemirovnıñ (Şumhay) evlerinde yapıldı.
Noyabrniñ 8-nde Seytumerovğa qarşı Rusiye Memuriy uquq bozuluvları kodeksiniñ 20.3 maddesi («ekstremistik teşkilâtlarınıñ atributikası ya da simvolikasını propaganda ya da numayış etüv») boyunca protokol tizildi. Aynı şu künü mahkeme oña 2 biñ ruble cöreme yazdı.
Bugünki künde Seytumerovdan başqaları üstünden serbest kezmelerine dair sıñırlavlar alıp taşlandı.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
