Link açıqlığı

Saatnıñ esas haberi

AQŞnıñ Ukrainadaki elçisi: Rusiyeniñ mahsus hizmetleri, işğalge qarşı er angi narazılıqnı bastırmaq içün qorqutuv kampaniyasını başladılar


Mari Yovanoviç, arhiv fotosı
Mari Yovanoviç, arhiv fotosı

Amerika Qoşma Ştatlarınıñ Ukrainadaki elçisi Mari Yovanoviç, Rusiyeniñ mahsus hizmetleri tarafından, işğalge qarşı er angi narazılıqnı bastırmaq içün keniş mıqyaslı qorqutuv kampaniyasınıñ başlanğanını bildire.

Bunı o, Kyivde «Amerika evi» medeniyet merkezinde «Umumiy insan aqları beyannamesi»niñ 70 yıllığına bağışlanğan tedbirde çıqış yapqanda söyledi, dep bildire dekabrniñ 12-sinde UNİAN.

Elçiniñ sözlerini ketirgen haber agentligi: «Olarnıñ (Rusiye mahsus hizmetleriniñ – QA) taktikası öldürüv, alıp qaçuv, ücüm etüv, ğayıp etüv, esassız yaqalanuv, bedeniy zorbalıq, sürgün etüv ve tecavuzdan ibarettir», – dey.

UNİAN, Yovanoviçniñ, qırımtatarlar Ukrainağa sadıq qalğanları ve işğalge qarşı narazılıq bildirgenleri içün hususiy taqiplerge oğratılalar, degenini yaza.

Agentlik, elçiniñ sözlerini ketirip: «Rusiye işğalci akimiyeti qırımtatarlarnıñ evleri, camiler ve mekteplerge sıq-sıq basıp kire, bunı vesiqalar şeklinde qayd etmek içün toplanğan qomşular ve şaatlarğa qarşı ise memuriy cöremeler ve diger cezalar yazdırta», – dep yaza.

Rusiye telikesizlik hizmetleri tarafından açıq menbalarda bu hususta izaat berilmedi.

Dekabrniñ 12-sinde Kyivde Ukraina prezidentiniñ qırımtatar halqınıñ işleri boyunca vekili Mustafa Cemilev ve Qırımtatar Milliy Meclisi reisiniñ muavinleri Ahtem Çiygoz ve İlmi Umerovnıñ iştiraki ile Umumiy insan aqları beyannamesiniñ 70 yıllığını qayd etüv munasebeti ile ötkerilgen tedbir yapıla.

Birleşken Milletler Teşkilâtınıñ Monitoring missiyası, ilhaq etilgen Qırımda bu yıl ağustosnıñ ortasından noyabrniñ ortasına qadar Rusiye telükesizlik hadimleri tarafından 49 qırımtatarnıñ yaqalanğanını bildirdi.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

Halqara teşkilâtları, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri oña qarşı bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG