QMC Prokuraturası, Rusiye tarafından ilhaq etilgen Qırım toprağında işlengen iqtisadiy cinayetlerniñ tahqiq etilmesi neticesinde yarımadada 4 biñden ziyade Ukraina işhaneleriniñ zapt etilüvi aqqında malümatnı elde etti. Zararnıñ umumiy miqdarı 1 trillion hrivnadan ziyadedir. Bunı dekabrniñ 12-sinde yapılğan brifingde Ukraina baş prokurorı Yuriy Lutsenko bildirdi.
Onıñ aytqanına köre, bu yerde, Qırım toprağındaki devlet muessiseleri ve şahsiy işhanelerge ait mal-mülkniñ mecburiy «milliyleştirilüv»i aqqında söz yürsetile.
Ukraina Baş prokuraturası (UBP) bu mal-mülkni tevqif etilgen olaraq ilân etmek içün bütün zarur olğan areketlerni yaptı.
Lutsenko: «Onıñ uquqiy statusınıñ er angi deñiştirilmesi, Ukraina ve daa soñra büyük ihtimal ile halqara qanunları boyunca taqip etilecek», – dep qayd etti.
UBPniñ malümatına köre, alınğan arizalarğa binaen bugün umumen 1,6 milliard hrivna tevqif etildi.
Rusiye tarafından açıq menbalarda bu hususta izaat berilmedi.
Ukraina tarafı, Qırım toprağında mal-mülk saipligi aqlarınıñ buzuluvına dair 10 adisesi boyunca munasip bildirüvni Halqara cinaiy mahkemesine yolladı.
Qırım Muhtar Cumhuriyeti Prokuraturası Qırımda bozuluvlar adiseleri boyunca üç haberdar etme bildirüvini Halqara cinaiy mahkemesine taqdim etti. Olarnıñ ekisi ilhaq etilgen yarımadada mal-mülk saipligi aqlarınıñ bozuluvı ve daa biri – Rusiye tarafından ilhaq etilgen topraqtan Ukraina vatandaşlarını zornen çıqarıluvı ile alâqalıdır.
Dekabrniñ 5-nde Gaagada Halqara cinaiy mahkemesiniñ kâtibligi, Ukrainada 2014 senesindeki vaqialarnıñ ilk tahqiqatnıñ neticeleri aqqında er yıllıq esabatını ilân etip, içinde Qırımnıñ ilhaq etilüvi esnasında Rusiye tarafından arbiy cinayetler işlengeniniñ alâmetleri olğanına işaret etti.
