«Qırım birdemligi» cemaat teşkilâtı bildirgenine köre, İçki rayonında rusiyeli küç idaresi hadimleri tarafından tutulğan qırımtatar faali İbraim Osmanovnıñ oğlu Rustem, politsiya rayon bölüginden qoyıp yiberilgen.
«Haber etilgeni kibi, İbraim Osmanovnıñ oğlu Rustemni Kiyev ROVDsından (içki işler rayon bölügi - QA) qoyıp yibergenler», – denilmekte cemaat teşkilâtınıñ Facebook saifesinde.
Dekabrniñ 12-nde saba Qırımnıñ İçki rayonı Ferngeym (Urojaynoye) köyündeki eki qomşu evde tintüv yapıldı. Ondan soñ qırımtatar faali İbraim Osmanovnıñ oğlu Rustem tutulıp alınğan edi.
Qırımtatar faali Zair Smedlâyev iddia etkenine köre, Rustem Osmanovnı Aqmescitke alıp ketkenler. O, bergen malümatqa köre, rusiyeli küç idaresiniñ hadimleri Osmanovnıñ evinde narkotik qıdırğan ekenler.
Qırımtatar milliy areketiniñ faali Nariman Celâl Qırım.Aqiqatqa İbraim Osmanov Kyivde olğanı aqqında ayttı.
Rusiye küç idaresiniñ hadimleri bu hususta iç bir türlü kütleviy izaat bermey.
Qırım işğalinden soñ yarımadada mustaqil jurnalistler, cemaat ve qırımtatar milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
