Rusiye nezaretindeki Aqmescit Merkez rayon mahkemesi 2014 senesi fevralniñ 26-nda Qırım Yuqarı Şurası binasınıñ ögünde Ukraina topraq bütünligine qoltutmaq içün keçirilgen miting «işi» figurantlarınıñ biri olğan Eskender Kantemirovnı sorğuladı.
Bu aqta Qırım.Aqiqatqa advokat Edem Semedlâyev ikâye etti.
«Kantemirov, ebet, qavğa olğan ve o anda iştirak etim, dep ayta, lâkin o qabaatlanğan bu qavğalarnı o kütleviy nizamsızlıq, dep tanımağanını beyan etti», – dep ikâye etti advokat.
Semedlâyev Qırımda azat etilgen qırımtatar Milliy Meclisi reisiniñ muavini Ahtem Çiygoznıñ «işi» boyunca mahkeme oturışuvınıñ protokollarını iş materiallarına qoşulmasını rica etti. Mahkeme daa evel bu «işnen» alâqalı ükümni işke qoşqanını sebep köstererek,bunı red etti.
Oturışuv esnasında taraflar çarpışuv videosını, hususan zarar körgenlerden biri dögülgen anni seyir ettiler. Advokat iddia etkenine köre, «qabaatlanğanlar videoda körünmey».
2015 senesi 2014 senesi fevralniñ 26-nda Qırım Yuqarı Şurası binasınıñ ögünde Ukraina topraq bütünligine qoltutmaq içün keçirilgen mitingte iştirak etken qırırmtatar faalleriniñ mahkemesi başlanğan edi. Olar kütleviy nizamsızlıqlar teşkil etmekte qabaatlana.
Daa soñra mahkeme «Fevral 26 işi»ni ekige ayırdı: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.
Rusiye akimiyeti oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umeriv ve Çiygoz Kyivge keldiler.
