Link açıqlığı

Kyivde «Amerika evi»nde aq-uquq qoruyıcıları Cemilev, Umerov ve Çiygoznen körüşüv yapıldı


«Amerika evi»nde körüşüv, 2017 senesi dekabr 12 künü

Qırım.Aqiqat muhbiri, Kyivde «Amerika evi» medeniyet merkezinde dekabrniñ 12-sinde üç sabıq siyasiy mabüs, qırımtatar halqınıñ liderleri Mustafa Cemilev, Ahtem Çiygoz ve İlmi Umerovnen körüşüv yapıldı, dep bildire .

«Umumiy insan aqları beyannamesi»niñ 70-nci yıllığına bağışlanğan tedbirni Amerika Qoşma Ştatlarınıñ Ukrainadaki elçisi Mari Yovanoviç açtı.

«Bugün siz Qırımda yaşaysız – 4 yıl evel yapılğan işğal neticesinde esasiy aqlarıñız ücümlerge oğraylar. Rusiyeniñ mahsus hizmetleri, işğalge qarşı er angi narazılıqnı bastırmaq içün keniş mıqyaslı qorqutuv kampaniyasını başladılar», – dedi o.

Yovanoviçten soñ qırımtatar milliy areketiniñ liderleri çıqış yaptı. Olar, nasıl etip siyasiy mabüs olğanlarını ikâye etip, bütün istegenlerniñ suallerine cevap berdiler.

Rusiye akimiyeti oktâbrniñ 25-nde Qırımda mahküm etilgen Qırımtatar Milliy Meclisi muavinleri Ahtem Çiygoz ve İlmi Umerovnı azat etip, Türkiyege teslim ettiler. Daa soñra Umerov ve Çiygoz Kyivge keldiler.

Halqara teşkilâtları, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri oña qarşı bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG