Qırım Muhtar Cumhuriyeti Prokuraturası Qırımda bozuluvlar adiseleri boyunca üç haberdar etme bildirüvini Halqara cinaiy mahkemesine taqdim etti. Olarnıñ ekisi ilhaq etilgen yarımadada mal-mülk saipligi aqlarınıñ bozuluvı ve daa biri – Rusiye tarafından ilhaq etilgen topraqtan Ukraina vatandaşlarını zornen çıqarıluvı ile alâqalıdır.
Bunı dekabrniñ 12-sinde Kyivde yapılğan brifingde Ukraina baş prokurorı Yuriy Lutsenko söyledi, dep bildire Qırım.Aqiqat muhbiri.
Lutsenkonıñ malümatına köre, dört biñden ziyade Ukraina işhanesi Qırımnıñ Rusiyege tabi akimiyetine qanunsız surette alıp berildi. Zararnıñ umumiy miqdarı trilliondan ziyade hrivnanı teşkil etti. Al-azırda Ukraina prokuraturası Qırım mal-mülküniñ tevqif etilgen olaraq tanılması içün areketler yapa.
Yerinden zornen köçürilgen insanlarğa kelgende, prokuraturanıñ malümatına köre, biñden ziyade keys toplandı.
Qırım Muhtar Cumhuriyeti prokurorı Gündüz Mamedov: «Bu cinayet (vatandaşlarnı zornen köçürüv – QA) butün Qırım yarımadasında demografik vaziyetiniñ deñişmesine, ealisiniñ Rusiye menfaatına uyğun şekilde deñişmesine, Ukrainanıñ tarafını tutqan ealiniñ sıqıştırıp çıqarılması ve belki de bütünley yoq etilmesine ketire», – dedi.
Ukraina prokuraturası, mezkür bozuluvlarnıñ Halqara cinaiy mahkemesiniñ uquq vekâletine tabi olğanlarına işaret ete.
Noyabrniñ soñunda QMC Prokuraturasıda, Qırımnıñ Rusiye tarafından qanunsız ilhaq etilüvi içün Nürnberg mahkemesi örneginde bir halqara mahkeme davasını açmaq istegenlerini bildirdiler.
2017 senesiniñ başında prokuratura hadimleri ögünde «İşğalciler tarafından Qırım yarımadasında işlengen arbiy cinayetler yani insanlıqqa qarşı cinayetler, genotsid ile alâqalı vaqialarnıñ Halqara cinaiy mahkemesinde baqılması içün bütün kerekli delillerni toplamaq» vazifesi qoyuldı.
Dekabrniñ 5-nde Gaagada Halqara cinaiy mahkemesiniñ kâtibligi, Ukrainada 2014 senesindeki vaqialarnıñ ilk tahqiqatnıñ neticeleri aqqında er yıllıq esabatını ilân etip, içinde Qırımnıñ ilhaq etilüvi esnasında Rusiye tarafından arbiy cinayetler işlengeniniñ alâmetleri olğanına işaret etti.
