Link açıqlığı

Qırımtatar faaliyetçisi Bekir Degermenci muvaqqat izolâtorda yaramadı – advokat


Bekir Degermenciniñ yaqalanuvı, Qırım, 2017 senesi noyabr 23 künü

Muvaqqat izolâtorda (SİZOda) «Veciye Kaşka işi» figurantı, qırımtatar milliy areketi faaliyetçisi Bekir Degermenciniñ sağlıq vaziyeti yamanlaşmaqta. Bunı, Qırım.Aqiqat içün bergen izaatta advokat Edem Semedlâyev söyledi.

«Bekirniñ sağlıq vaziyeti yamanlaşmağa devam ete. O, yalıñız oturıp yuqlay bile ve daima ilâc tamızıcı altında buluna. O endi bir qaç gece normal şekilde yuqlap olamay, çünki yatqanda nefesi tutulıp başlay.

Semedlâyevniñ aytqanına köre, Degermenciniñ aqciger avalandırmasına ihtiyacı bar.

«İlâc tamızıcı altında olğanı içün onı çıqarıp olamadılar. Yalıñız oturğan alda buluna bile. Oña ayaqyolğa barmaq bile zor kele», – dedi advokat.

Smedlâyev, SİZO başlığı ve tıbbiyet bölügi adına tekrar şikâyet yazıp, imayesi altında bulunğanını hastahanege keçirmekni talap etti.

Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Rusiye FSBsiniñ Qırım boyunca idaresi yaqalanğan faaliyetçilerni Türkiye vatandaşından «aqsız yerde hususan büyük miqdarda para talap etüv»de qabaatlay.

Qırımtatar faaliyetçileriniñ yaqalanuvı esnasında qırımtatar milliy areketiniñ veteranı Veciye Kaşka yaramadı. Adise yüz köstergen yerinden onı «acele yardım» alıp ketti. Daa soñra qadınnıñ vefat etkeni belli oldı.

Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apis etti.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG