Link açıqlığı

Saatnıñ esas haberi

BMT Missiyası: Qırımda üç ay içinde 49 qırımtatar yaqalandı


Birleşken Milletler Teşkilâtınıñ Monitoring missiyası, ilhaq etilgen Qırımda bu yıl içinde ağustosnıñ ortasından noyabrniñ ortasına qadar Rusiye telükesizlik hadimleri tarafından 49 qırımtatarnıñ yaqalanğanını bildirdi.

Bunı Ukrainada insan aqları boyunca BMT Monitoring missiyasınıñ reisi Fiona Freyzer, 2017 senesi ağustosnıñ 16-sından noyabrniñ 15-ne qadar devam etken muddet içünde Ukrainada insan aqları saasındaki vaziyet boyunca 20-nci maruzanı taqdim etkende söyledi, dep bildire UNİAN.

«İnsan aqlarınıñ bu bozuluvları qırımtatarlarğa tesir ete. Esabat muddeti içinde 49 qırımtatar yaqalanıp, belli bir muddetke apis etildi», – dedi Freyzer.

Cümleden o, qırımtatarlarnıñ evlerinde yapılğan tintüvlerden soñ ekstremistik teşkilâtnı teşkilâtlandırğan ya da böyle teşkilâtta iştirak etkende qabaatlanğan 10 kişiniñ yaqalanğanını qayd etti. Yaqalanğanlar ile birdemligini numayış etken daa 9 kişi de tevqif etildi.

Freyzer, İnsan aqları boyunca BMT Baş komissarınıñ idaresi, BMT Baş assambleyasınıñ qararlarına esaslanıp, közetmege, vesiqalar şeklinde qayd etmege ve Qırımda insan aqları saasındaki vaziyet ile alâqalı faktlar aqqında esabatlar bermege devam ete, dep ilâve etti.

Ondan ğayrı BMT temsilcisi, Qırımda yalıñız noyabr ayında Rusiye telükesizlik hadimleri qırımtatarlarnıñ evlerinde 18 tintüv yaptılar, dep qayd etti.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

Halqara teşkilâtları, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri oña qarşı bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG