Link açıqlığı

Bağçasarayda faaliyetçiler «Qırım marafonı» çerçivesinde nevbetteki cöremelerni tölediler


İllüstrativ foto

«Qırım birdemligi» cemiyet birleşmesiniñ faaliyetçileri, oktâbrniñ 11-nde Bağçasaraydaki «Hizb ut-Tahrir işi» boyunca ypılğan tintüvler ve yaqalanuvlar esnasında sözde resmiy izin alınmayıp ötkerilgen miting içün beş faaliyetçige yazılğan cöremelerni ödediler.

Bunı Qırım.Aqiqat muhbiri bildire.

Faaliyetçi Server Mustafayev Qırım.Aqiqatqa: «O künü episi olıp on faaliyetçi yaqalandı. Episiniñ üstüne cöremeler yazıldı. Bugün «Qırım marafonı» çerçivesinde biz bu cöremelerni ödedik. Bu cöremeler farqlı tüşüngenlerge qarşı küreşten başqa bir şey degildir. Bu sebepten men, bugün körmekte olğanımızğa oşağan qol tutuvınıñ er vaqıt olacağına ümüt etem», – dep ikâye etti.

Üzerlerine cöremeler yazılğanlarnıñ üçü – Refat Asanov, Elnur Asanov ve Ernest İbragimov – «Hizb ut-Tahrir işi» boyunca tevqif etilgen Marlen Asanovnıñ soylarıdır.

Üstlerine cöreme yazılğan daa eki faaliyetçi – Ruslan Belâlov ve Eskender Lümanov – «Hizb ut-Tahrir» işiniñ diger bir figurantı olğan Seyran Saliyevniñ evi yanında yaqalandılar.

Oktâbrniñ 11-nde, Bağçasarayda Rusiye telükesizlik hadimleri tarafından qırımtatar musulmanlarınıñ bir qaç evinde tintüvler yapılğanı belli oldı. Maallelerde telükesizlik hadimleri, tintüvler ötkerilgen evler yanına kelgen adamlarnı yaqaladılar. Daa soñra yaqalanğanlarğa bedeniy zararnıñ ketirilgeni belli oldı.

Aynı şu künniñ aqşamında Kremlniñ kontroli altında bulunğan mahkeme, oktâbr 11 sabasında qırımtatarlarnıñ evlerinde yapılğan tintüvler esnasında Rusiye telükesizlik hadimleri tarafından yaqalanğan doquz faaliyetçini, 10 biñ rubleden 20 biñ rublege qadar miqdardaki memuriy cöremelerge mahküm etti.

Oktâbrniñ 11-nde Rusiye kütleviy haber vastaları, Rusiye Federal telükesizlik hizmetiniñ (FSB) matbuat hizmetine sıltav etip, Qırımda telükesizlik hadimleri, Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ Bağçasaraydaki ücresini yoq ettiler, dep bildirdiler.

«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep sayalar. Advokat Emil Qurbedinov, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd ete.

Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.

Rusiye tarafından ilhaqından soñra Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

İyulniñ 31-nde ilhaq etilgen Qırımda «Qırım birdemligi» birleşmesi, yarımadadaki siyasiy mabüslerge ve cemiyet faaliyetçilerine qol tutmaq maqsadınen «Qırım marafonı» adlı para toplavını ilân etti.

Tedbir teşkilâtçılarınıñ niyetine köre, «pervasız olmağanlar» birdemligini köstermek içün 10 Rusiye rublesi (qararnen 4 hrivna – QA) qıymetinde aqçalar toplaylar.

XS
SM
MD
LG