Kremlniñ kontroli altında bulunğan Bağçasaray rayonı mahkemesi qırımtatar faaliyetçisi Rustem Osmanovğa, resmiy ruhset alınmayıp ötkerilgen mitingde iştirak etkeni içün 10 biñ ruble cöreme yazıldı.
Bunı dekabrniñ 11-nde Qırım.Aqiqat muhbiri bildire.
Mahkeme faaliyetçini «neticede naqliyat ve/veya cayav yürgenler içün zarar ketirilgen kütleviy tedbirniñ tayin etilgen tertibini bozuv»da (Rusiye Mimariy uquq kodeksiniñ 20.2 maddesi, 6.1 qısmı – QA) qabaatladı.
Mimariy uquq bozuv işiniñ materiallarında, Osmanov ve diger faaliyetçiler, daa bir faaliyetçi – Seydamet Mustafayevniñ evinde tintüv yapılğan vaqıtta maşinalar ve cayav yürgenlerniñ keçmesine zarar ettiler, denile.
Adliyeci Rustem Kâmilev: «Asılında onıñ (Osmanovnıñ – QA) cinayeti isbatlanmadı. Mimariy işte, diger mimariy işlerde olğan polis memurlarınıñ raportları ile şaatlarnıñ ifadeleri yer almaqta. Aqiqatta insan işlemegen qanun bozuluvında qabaatlandı, lâkin mahkeme cinayet taptı», – dedi. İmaye em mahkemege, em de İnsan aqları boyunca Avropa mahkemesine resmen şikâyet etip, Bağçasaray mahkemesi tarafından alınğan qararınıñ ğayrıdan baqılmasını talap etecek.
Faaliyetçige qol tutmaq içün 30-ğa yaqın kişi keldi. Açıq oturışuvğa ömür arqadaşı ile ana-babasından ğayrı kimseni yibermediler. Qalğanlarğa binağa kirmek yasaq etildi.
Dekabrniñ 11-ne saba Bağçasarayda qırımtatar faaliyetçisi Rustem Osmanov yaqalandı. Onı evden üstlerinde tanıtıcı belgiler olmağan adamlar alıp ketti. Daa soñra onıñ, Bağçasaray Rayon içki işler bölüginde bulunğanı belli oldı.
Rustem Osmanov, «Qırım birdemligi» cemiyet areketiniñ faaliyetçisidir.
Rusiye telükesizlik hadimleri tarafından açıq menbalarda bu hususta iç bir izaat berilmedi.
Rusiye tarafından ilhaqından soñra Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
