Kremlniñ kontroli altında bulunğan Kefe şeer mahkemesi azırlıq oturışuvında, Suleyman Kadırovnıñ imayesi tarafından resmen berilgen ricanı qabul etip, işke qabaatlav tarafınıñ lingvistik ekspertizasına dair mutehassıslarnıñ fikrini ilâve etti. Bunı dekabrniñ 11-nde Qırım.Aqiqat muhbiri bildirdi.
«İmaye tarafı işke qabaatlav tarafınıñ lingvistik ekspertizasına dair mutehassıs fikriniñ ilâve etilmesi içün resmiy surette rica etti. – Bu, qabaatlav tarafınıñ esas delillerinden biri olıp, tahqiqat ve prokuror onıñ yardımınen qabaatnı isbatlaycaq olalar. İlimler namzeti ve doktorı derecelerinde olğan mutehassıslar bu ekspertizanı tetqiq etip, onıñ ilmiy ceetten esassız olğanını tayin ettiler. Bundan soñ ekspertiza mahkemede tetqiq etilecek. Bu, qabaatlavnıñ ekspertizasını qabul etilmez bir delil olaraq tanımağa yardım etecek, dep ümüt etem», – dedi advokat Aleksey Ladin.
Öz nevbette Suleyman Kadırov oturışuvdan soñ, özüni qabaatlı tanımağanını söyledi.
Kadırov mahkemeden soñ: «Göñlüm temiz, lâkin olarda (akemlerde – QA) daa soñra göñülleri ne olacaq, baqarmız. Faalligim ve Qırımda olıp keçken adiseler boyunca açıqtan bildrgen fikirlerim içün taqip etilgenime eminim. Men mahkemede de öz fikrimi gizlemeycem. Dünya cemaatçılığı Qırımda neler olıp keçkenini bilmek kerek», – dedi.
Bundan soñki mahkeme oturışuvı dekabrniñ 20-sine tayin etildi.
2016 senesi oktâbrniñ 5-nde Rusiye telükesizlik hadimleri qırımtatar faaliyetçisi Suleyman Kadırovnıñ evine tintüv etmek içün keldiler. Tintüv, Radionov soyadlı akem tarafından, Rusiyeniñ sıñırlarını tanımamağa davet ve «Asker» cemiyet birleşmesine qol tutuv sebebi ile şübhe altına bulunğanı içün evni közden keçirilmesine dair alınğan qarar esasında yapılğan edi.
2016 senesi oktâbrniñ 11-nde Suleyman Kadırovğa qarşı «separatizm» şübhesi ile cinaiy iş açıldı.
2017 senesi aprelinde Rusiyeniñ maliye monitoringi boyunca hizmeti Suleyman Kadırovnı ekstremistler ve terroristler cedveline kirsetti.
Rusiye tarafından ilhaqından soñra Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
