Link açıqlığı

Dekabrniñ 11-nde Kyivde, Qırımdaki siyasiy mabüslerge qol tutmaq içün kino kösterilüvi ötkerilecek


Dekabrniñ 11-nde Kyivdeki «Azat Rusiye evi»nde Qırım siyasiy mabüslerine qol tutmaq içün qırımtatar lideri Mustafa Cemilev aqqında «Mustafa» filminiñ hayriye kösterilüvi ötkerilecek.

Kino kösterilüvini saat 19:00-da başlamağa planlaştıralar, dep bildire teşkilâtçılar Facebookta.

Bildirüvde, tedbirden evel film içün alınğan biletler hayriye bedeline deñiştirilecekler. Hayriye bedeliniñ başlanğıç miqdarı 70 hrivna, dep bildirile.

Teşkilâtçılar, kino kösterilüvniñ iştirakçileri siyasiy mabüsler içün tebrik kartı imzalay bilir ya da mektüp yaza bilirler, dep bildireler.

Tedbir, iştirakçilerden evelden qayd etilmelerini talap ete.

Bundan evel Moskvada «Oktâbr» kinoteatrı «Artdokfest» vesiqalı kino festivalinde kösterilecek olğan «Mustafa» filmini, sebebini añlatmayıp, kösterilüvden alıp taşladı.

«Mustafa» filmi seyircige Ukraina siyasetçisi ve cemiyet erbabınıñ ayatı, sovet akimiyeti zamanında qırımtatarlarnıñ Qırımğa qaytuvı oğrundaki küreşi, apis etilüvi ve açlıq tutqan zamanı aqqında ikâye ete. Film qırımtatar milliy lideriniñ harakterini añlata, Cemilevniñ ayatında şimdiki dönemi ve Qırımnıñ işğaline qarşı küreşini köstere. Ayatınıñ ikâyesini qaramannıñ özü, tarihçılar, Cemilevniñ eñ yaqın etrafındakileri ve Sovet Birliginiñ dissidentleri aytıp berdiler. Rejissör Ahmed Sarıhalil em oyun kadrları – qırımtatar lideriniñ hatırlavlarından ayrı anlarnı, em de intervyu parçaları, vesiqalı hronikalarnı qullandı.

XS
SM
MD
LG