Link açıqlığı

İraq baş naziri «İslâm devleti» ile cenkniñ bitirilgenini bildirdi


Dekabrniñ 9-nda İraq baş naziri Hayder al-Abdi, ülkesiniñ «İslâm devleti» gruplaşmasınıñ dögüşçilerine qarşı cenki muvafaqiyetnen bitirildi, dep bildirdi.

Onıñ aytqanına köre, evelden islâmcılar tarafından zapt etilgen bütün topraqlar şimdi kene İraq akimiyetiniñ kontroli altına keçti ve ülkeniñ qomşu Suriye ile sıñırı İraq askerleri tarafından kontrol etile.

«Duşmanımız medeniyetimizni öldürecek oldı, amma biz, birligimiz ve qatiyligimiz sayesinde ğalebe qazandıq», – dedi al-Abdi.

«Bütün İraq topraqları terrorist gruplarından azat etildi, quvetlerimiz halqara İraq-Suriye sıñırını tolusınen kontrol ete», – denile İraq arbiy hadimleriniñ bildirüvinde.

2014 senesinde «İslâm devleti» gruplaşması İraq toprağınıñ üçte birge yaqın qısmını zapt etti. Buña cevaben AQŞ yolbaşçılığındaki halqara koalitsiya «İslâm devleti»ne qarşı arbiy kampaniyanı başladı.

XS
SM
MD
LG