Link açıqlığı

UDMH sözcüsi hicab meselesi aqqında: er angi baş kiyiminde yapılğan fotosuretler vesiqalarda qullanılmazlar


Ukraina Devlet migratsiya hizmeti (UDMH) vesiqalar içün er angi baş kiyimi ile ve bu cümleden hicab ile fotosuretke çıqmaqnı yasaq ete. Bunı Qırım.Aqiqatqa UDMH sözcüsi Sergey Gunko söyledi.

1994 senesiniñ standartına köre, er angi baş kiyiminde yapılğan fotosuretler vesiqalarda qullanılmazlar. Başqa kiyilgen er angi kiyim yasaq», – dedi Gunko.

Avropa Birligi ülkeleriniñ standartları musulman qadınlarğa dinniñ talabına köre hicab ile fotosuretke çıqmağa izin bereler.

Kyivde Qırım Muhtar Cumhuriyeti musulmanları diniy idaresiniñ (QMC MDİ) müftisi Ayder Rustemovnıñ aytqanına köre, hicabnen yapılğan fotosuret pasport içün qabul etilmese, musulman qadınlar QMC MDİniñ uquqçısına muracaat ete bileler.

Vinnitsa vilâyetinde yaşağan Qırım muhacirleri, musulman qadınlarğa devlet ve çetel pasportları içün hicab ile fotosuretke çıqmaq yasaq etilgenine qarşı küreşmege devam etkenlerini bildirdiler.

«Vetan» cemiyet teşkilâtı, UDMH tarafından vesiqalar ve bu cümleden biometrik pasportlar içün hicablı fotosuretler qabul etilmegenini bildirdi.

XS
SM
MD
LG