Dekabrniñ 8-nde Ukraina prezidenti Petro Poroşenko, Litva Cumhuriyeti prezidenti Dalia Gribauskayte ile beraber ötkergen matbuat konferentsiyasında, Litvanıñ, Qırımda işğal rejiminiñ yoq etilmesi ceryanında faal surette iştirak etecegini bildirdi.
«İnterfaks» haber agentligi Poroşenkonıñ: «Men, Qırımda işğal rejimini yoq etmek maqsadınen «dostlar grubu»nıñ meydanğa ketirilmesi içün Ukraina tarafından kösterilgen ğayretler aqqında prezident hanım efendini haberdar ettim. Ve Litvanıñ Qırımda işğal rejiminiñ yoq etilmesi ceryanında faal surette iştirak etecegine dair işandıruvlar eşitip, pek memnün oldım», – degenini bildire.
Bildirüvdeki malümatqa köre, Ukraina prezidenti, Gribauskayte ile Donbassta OSCE (OBSE)niñ umumiy monitoring missiyasında (UMM) Litvanıñ iştirak etüvini arttıruv meselesini muzakere etkenini bildirdi.
«Biz Litvanıñ OSCE UMMde iştirak etüv boyunca ğayretlerine yüksek qıymet kesemiz. Biz bugün Litvanıñ iştirakini sayıca arttıruv imkânını da muzakere ettik», – dedi Poroşenko.
Ukraina prezidentiniñ matbuat hizmeti bildirgeni kibi, dekabrniñ 8-nde Ukraina ve Litva Presidentleri Şurasınıñ onıncı oturışuvı neticesinde devletlerniñ liderleri Petro Poroşenko ve Dalia Gribauskayteniñ uzurında eki taraflı emekdaşlıq boyunca bir qaç vesiqa imzalandı.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
