«OVD-İnfo» haver agentligi, festivalda göñülli olaraq çalışqan bir şahısnıñ sözlerine esaslanıp, Moskvadaki «Oktâbr» kinoteatrı, sebebini bildirmeyip, «Artdokfest» vesiqalı filmler festivali çerçivesinde kösterilecek olğan «Mustafa» filmni kösterüvden alıp taşladı, dep bildire.
Dekabrniñ 6-sında rusiyeli rejissör Askold Kurovnıñ Oleg Sentsov aqqında «Protsess» («Mahkeme davası») filminiñ kösterilüvi ile «Artdokfest» vesiqalı filmler festivaliniñ açılışı yapıldı.
«Mustafa» filmi seyircige Ukraina siyasetçisi ve cemiyet erbabınıñ ayatı, sovet akimiyeti zamanında qırımtatarlarnıñ Qırımğa qaytuvı oğrundaki küreşi, apis etilüvi ve açlığı aqqında ikâye ete. Film qırımtatar milliy lideriniñ harakterini añlata, Cemilevniñ ayatında zemaneviy dönemini ve Qırımnıñ işğaline qarşı küreşini köstere. Ayatınıñ ikâyesini qaramannıñ özü, tarihçılar, Cemilevniñ eñ yaqın etrafındakileri ve Sovet Birliginiñ dissidentleri aytıp berdiler. Rejissör em oyun kadrları – qırımtatar lideriniñ hatırlavlarından ayrı anlarnı, em de intervyu parçaları, vesiqalı hronikalarnı qullandı.
Filmniñ rejisörı – Ahmed Sarıhalil, baş rolni professional aktör Maksım Pasıçnik oynadı.
Filmniñ büdjetini Demokratiyağa qoltutuv Milliy Fondu tarafından berilgen 50 biñ dollar ile ayrı şahıslar tarafından ediye etilgen 150 biñ hrivna teşkil ettiler.
