Qırımtatar «Meydan» radiosı ilhaq etilgen Qırımda Astra A4 sputnigi vastasınen yayınlanacaq. Dekabrniñ 7-sinde Ukrainanıñ Teleradioyayınları boyunca Milliy şurası bu qarar içün ses birligi ile rey berdi.
Bunı dekabrniñ 7-sinde Qırım.Aqiqat içün bergen izaatlarda Milliy şuranıñ azası Sergey Kostinskiy söyledi.
«Meydan» bugün em haberler, em haber ve analitika yayınları, em de muzıka… Menim fikrime köre, bizler içün bu, işğal etilgen Qırımda yaşağan vatandaşlarımızğa Ukrainanıñ telekanalları ve radiostantsiyalarına irişüvniñ temin etilmesine doğru atılğan daa bir adımdır», – dedi Kostinskiy.
Onıñ aytqanına köre, yayınlar Astra A4 sputnigi vastasınen naqil etecekler.
«Bütün qullana bilgen tehnologiyalar arasında işğal etilgen territoriyada yayın yapmaq içün eñ effektiv olğan, sputnik yayınıdır. Soñ vaqıtlarda signalı açıq olğan radiostantsiyalar da sputnikke çıqalar. Bu, signalnı televizor vastasınen qabul etmege imkân bere. Radionı er bir şeerde ya da qasabada diñlemek mümkün olacaq», – dep, ilâve etti o.
Ağustosnıñ 17-sinde Herson vilâyetindeki Çonğar teleradioqulesinden ilhaq etilgen Qırım territoriyasına raqamlı televideniye yayın etilmege başladı.
Şimaliy Qırım territoriyasında beş kanal yayın etile – «UA:Krım», «5 kanal», «Prâmoy kanal» («Tonis»), ICTV ve «Çernomorskaya teleradiokompaniya».
Ukrainanıñ televideniye ve radio yayınları boyunca Milliy şurası Qırım ve Aqyarda temsilcisi vazifesini ğayrıdan tayin etti.
Noyabrniñ 23-nde Kostinskiy, Kyivniñ Rusiye tarafından ilhaq etilgen Qırım territoriyasına yayınlav küçü üç qattan ziyade arttırılğanını bildirdi.
