BMT Telükesizlik Şurasınıñ 15 azasından sekizi, AQŞ prezidenti Donald Trampnıñ Qudüsni İsrailniñ paytahtı tanımaq qararını muzakere etmek içün dekabrniñ 8-nde sıradan tış meclisniñ ötkerilmesi teşebbüsinen çıqtılar.
«Men muntazam surette, israilliler ve filistinliler içün barış perspektivasını telüke altına qoya bilecek er angi tek taraflı tedbirlerge qarşı çıqa edim… Bu havflı daqiqada men bir şeyni añlamaq içün imkân bermek isteyim: eki devlet aqqında qararınıñ alternativası yoq, B planı yoq», – dedi BMT Baş kâtibi.
Prezident Tramp, dekabrniñ 6-sındaki nutqunda, Qudüsniñ İsrail paytahtı olaraq tanılması, «er keske belli olğan şeyniñ tanılması»ndan başqa bir şey degildir, dedi.
Tramp, AQŞ Devlet departamentine AQŞ elçiliginiñ Tel-Avivden Qudüske keçirilmesi içün azırlıq işlerini başlamaq buyurdı. Mutehassıslarnıñ aytqanına köre, bu iş üç yıldan dört yılğa qadar devam etmek mümkün.
Bu sözler, onlarnen yıllar devam etken AQŞnıñ siyasetini deñiştirdi. Oña köre, şeerniñ statusı filistinlilernen muzakereler neticesinde al etilmek kerek.
Yaqın Şarq ülkeleri Trampnıñ bu qararını taqbih etti, Avropa liderleri ise zorbalıqnıñ başlamasından saqınıp, bütün taraflarnı tınçlıqnı saqlamağa davet ettiler.
