Ukraina Tış işleri naziri Pavlo Klimkin Venada OSCE (OBSE) Nazirler Şurasınıñ oturışuvında Qırımdaki vaziyet içün cümleden yañı sanktsiyalar qabul etilmesi yolunen Rusiyege tazyıqnı arttırmağa davet etti.
Bunı o, Twitterde bildirdi.
«Qırımda insan aqlarınıñ er bir bozuluvı yañı sanktsiyalarğa ketirmek kerek. Bu effektiv surette tesir ete», – qayd etti nazir.
Ukraina Tış işleri nazirliginiñ (TİN) siyasiy şubesi mudiri Oleksey Makeyevniñ malümatına köre, Klimkin ondan ğayrı halqara ortaqlarını Qırımnıñ azat etilmesi meselesine kelgende iç bir vaqıt teslim olmamağa ve Rusiyege qarşı daa sert sanktsiyalar qullanmağa davet etti.
Ondan ğayrı TİN sözcüsi Maryana Betsa, Klimkinniñ sözlerine esaslanıp, Ukraina tış işleri müessisesi yolbaşçısınınıñ Rusiyege tazyıqnı arttırmağa davet etkenini bildirdi.
Onıñ aytqanına köre, AQŞ, Kanada, İsveç (Şvetsiya), Türkiye, Litva, Latviya, Poloniya, Romaniya, Estoniya, Norvegiya, Büyük Britaniya ve Daniya «Rusiyege tazyıqnı arttırmaq kerek» olğanına razı oldılar.
Qırımtatar Milliy Meclisi reisiniñ muavinleri Ahtem Çiygoz ve İlmi Umerov da OSCE azaları olğan ülkeleriniñ nazirleri ve AQŞ devlet kâtibi Reks Tillerson ile körüşmek içün Venağa kettiler.
Bu yılnıñ sentâbr ayında Avropa Birliginiñ Şurası, Rusiye ve separatistlerniñ vekilleri olğan 149 fizikiy şahıs, ve Ukrainada topraq bütünligi ve mustaqilliginiñ bozuluvına alâqası olğan 38 uquqiy şahısqa qarşı tayin etilgen sanktsiyalarnıñ qullanılmasını 2018 senesi martnıñ 15-ne qadar devam ettirdi.
Ağustosnıñ 4-nde ABniñ, sanktsiyalarğa rağmen Siemens şirketi turbinalarınıñ ilhaq etilgen Qırımğa ketirilmesine qarşı reaktsiyası olaraq bu cedvelge Rusiyeniñ daa üç fizikiy şahsı ile daa üç uquqiy şahıs ilâve etildi.
Cedvelge kirgenlerniñ episine Avropa Birligine kiriş yasaq ve Avropa banklarında aktivleri tapılsa, buzlatılmaq kerekler.
