Link açıqlığı

Ukraina adliye nazirligi: Rusiyeniñ Keriç boğazında köpür qurması ve gemiler areketini sıñırlaması qanunsız


Ukraina adliye naziri Pavlo Petrenko

Rusiye Keriç boğazında köpür qurması qanınsız ve bu qurucılıqta iştirak etkenlerge qarşı şahsiy sanktsiyalar qullanılması mümkün. Ukraina adliye naziri Pavlo Petrenko dekabrniñ 7-nde derc etilgen «İnterfax Ukraina»daki intervyusında beyan etti.

«Bu – gemilerniñ areketi sıñırlana ve bizim topraqlarımızda qanunsız qurulış yapıla degen manağa kele. Aslında mesele daa ziyade bu esnasqa celp etilgen şirketlerge qarşı sanktsiyalar kirsetilmesinen bağlı», – dedi nazir.

Onıñ sözlerine köre, Rusiyeniñ Keriç boğazındaki areketi, BMT (OON) Deñiz uquqı şartnamesinen bağlı olğanı içün, Ukrainanıñ BMT (OON) halqara mahkemesi çerçivesinde tribunal tarafından körip çıqılması içün açılacaqdavasına sebep oldı. Söz - Qırım ve Qara deñizdeki şelf ve tabiiy resurslarnıñ qanunsız şekilde qullanılğanı aqqında kete.

Keriç boğazında köpür qurulması kerekligi aqqında Putin ta 2014 senesi Qırım işğalinden soñ aytqan edi. Köpür 2018 senesine qadar qurulıp, 2019 senesi yaz aylarında işke tüşürilecegi vaad etilgen edi.

Ukraina infrastrukturası naziri Vladimir Omelyan iddia etkenine köre, Keriç köpüriniñ qurulışını acele sürette toqtamaq kerek ve bu yalıñız, Ukrainanıñ halqara ortaqlarınıñ basqısı ve Rusiyege qarşı kirsetilgen ilâve sanktsiyalar vastasınen yapılması mümkündir.

Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü olaraq qabul etti.

XS
SM
MD
LG