Qırımtatar Milliy Meclisi reisiniñ muavinleri İlmi Umerov ve Ahtem Çiygoz, olarnıñ Qırımda azat etilmesinen bağlı vesiqalarnıñ gizliligi açılmasını talap eterek, Rusiye prezidenti memuriyetine qarşı dava arizası bermek niyetinde.
Bu aqta Polozov dekabrniñ 7-nde Facebookta haber etmekte.
«Moskva mahkemesinde olarnı men temsil etecem. Bizler prezident Putinniñ memuriyetinden Ahtem Çiygoz ve İlmi Umerov Qırım territoriyasından nasıl şartlar ve ne esasında alıp çıqılğanına dair açıq bir cevap berilmesini talap etecekmiz», – dep yaza Polozov.
Polozov iddia etkenine köre, Umerov ve Çiygoz «uquqiy ceetten alâ daa Qırımda bulunmaqtalar, dep sayıla», çünki olarnıñ Türkiyege ketmesi içün iç bir vesiqa berilmedi.
Bu yıl sentâbr ayında Kreml nezaretindeki Qırım Yuqarı mahkemesi Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alındı. Çiygoz kutleviy nizamsızlıqlar teşkil etmekte qabaatlanğan edi.
Ondan soñ mahkeme İlmi Umerovnı Qırımda eki yıl yaşav tarzındaki koloniyada qaluv cezasına mahküm etken edi. Umerov açıq menbalarda yapılğan separatizmge çağıruv yapmaqta qabaatlandı.
Rusiye akimiyeti oktâbrniñ 25-nde Umerov ve Çiygoznı azat etip, Türkiyege teslim etti. Daa soñra qırımtatar halqı Milliy Meclisiniñ yolbaşçıları Kyivge keldiler.
Kreml Umerov ve Çiygoznıñ azat etilgenine dair vesiqalarnı bermekni red etti.
