Rusiyeli advokat Nikolay Polozov iddia etkenine köre, işğal altındaki Qırımda azat etilgen qırımtatar Milliy Meclisi reisiniñ muavini İlmi Umerov ve Ahtem Çiygoz «uquqiy ceetten alâ daa Qırımda bulunmaqtalar, dep sayıla», çünki olarnıñ Türkiyege ketmesi içün iç bir vesiqa berilmedi.
Bu aqta Polozov Facebook saifesinde yaza.
«Ahtem Çiygozğa SİZOdan berilgen yekâne vesiqa, onıñ azat etilmesinen bağlı bir malümatname. İlmi Umerovnıñ Qırım tışına çıqqanını tasdıqlaycaq iç bir vesiqa yoq. Kâğıtlarğa binaen, de-yure Çiygoz ve Umerov alâ daa Qırımda bulunmaqtalar, dep sayıla», – dep yaza advokat.
Ayrıca, onıñ fikrine köre, Çiygoznıñ azat etilmesinen alâqalı malümatnamede, onıñ «af etilgeni» aqqında yazılğanı, «ilişmek mümkün olacaq yekâne bir vesiqa» sayıla.
Bu yıl sentâbr ayında Kreml nezaretindeki Qırım Yuqarı mahkemesi Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alındı. Çiygoz kutleviy nizamsızlıqlar teşkil etmekte qabaatlanğan edi.
Ondan soñ mahkeme İlmi Umerovnı Qırımda eki yıl yaşav tarzındaki koloniyada qaluv cezasına mahküm etken edi. Umerov açıq menbalarda yapılğan separatizmge çağıruv yapmaqta qabaatlandı.
Rusiye akimiyeti oktâbrniñ 25-nde Umerov ve Çiygoznı azat etip, Türkiyege teslim etti. Daa soñra qırımtatar halqı Milliy Meclisiniñ yolbaşçıları Kyivge keldiler.
Kreml Umerov ve Çiygoznıñ azat etilgenine dair vesiqalarnı bermekni red etti.
