Qırımtatar asıllı ukrain kinorejissör Ahtem Seitablayevni arbiy drama sayılğan «Kiborglar» filmi, dekabrniñ 7-nde keniş ukrain kitlesine numayış etilmek üzre, oynatılmağa çıqtı.
Bu aqta Ukraina Devlet kinosı özüniñ resmi saifesinde bildirmekte.
«Bizim filmimiz cenk aqıında degil, işbu cenk içinde doğğan barışıq aqqında. Stsenariy yazılğanda kerçek «kiborglar» iştirak etti. Olarnıñ birisi er kün çekim meydanında bulunğanı içün, bu bizge pek çoq yardım etti», – dep bildire Devletkino Seitablayevniñ sözlerini.
Daa evel Ukraina Devletkinosınıñ reberi Filipp İlyenko, dekabrniñ 7-nde Seitablayevniñ numayış etilmege başlaycaq «Kiborglar» filmi, beklengeninden ziyade tesirli olıp çıqqanını beyan etken edi.
Açıq menbalardan alınğan malümatqa köre, «Kiborglar» filmi, Ukraina Şarqınıñ Donetsk avalimanında terroristlerge qarşı ötkerilgen operatsiya aqqında ikâye ete. Rejissör Seitablayev janrğa köre onıñ filmi arbiy dramadır, dep saya.
Bu film Ukraina Devletkinosından, onıñ çıqmasına masraf etilecek yarı parasını teşkil etken 24 million grivnalıq maddiy yardım alğan edi.
Filmniñ prodüseri İvanna Dedüra aytqanına köre, «Kiborglar» filmini Baltika devletleri, Poloniya ve Canada kiralamaq niyetli.
Ahtem Seitablayev dekabrniñ 4-nde qırımtatar halqınıñ lideri Mustafa Cemilev 2014 senesi mayısnıñ 3-nde Rusiye tarafından işğal etilgen Qırımğa kirsetilmegeninen bağlı yañı filmniñ stsenariyi üzerinde çalışqanı aqqında ikâye etken edi.
Ukraina prezidenti Petro Poroşenko dekabrniñ 6-nda Seitablayevni III derece «Yaralıq» ordeninen taqdirledi.
