Link açıqlığı

Dekabrniñ 7-sinde mahkeme Bağçasaraydaki «Hizb ut-Tahrir işi» figurantlarına apis muddetini uzatuv meselesini baqacaq


Rusiyeniñ kontroli altında bulunğan Aqmescitniñ Kyiv rayonı mahkemesi dekabrniñ 7-sinde tahqiqatnıñ, Bağçasaraydaki ekinci «Hizb ut-Tahrir işi» figurantları Timur İbragimov, Seyran Saliyev ve Belâl Mambetovğa muvaqqat izolâtordaki apis muddetini uzatuv boyunca talabını baqacaq. Bunı Qırım.Aqiqat muhbiri bildire.

Mahkeme oturışuvları yerli vaqıt boyunca saat 14:00-ge tayin etildi.

Advokat Edem Semedlâyev Qırım.Aqiqat içün bergen izaatında: «Bugün biz, er vaqıt olğanı kibi, sıñırlav tedbirini muvaqqat izolâtorda apis etilüvden ev apisine deñiştirilmesini talap etecekmiz. Mahkemeniñ qararına dair hususiy bir ümütlerimiz yoq», – dedi.

Dekabrniñ 6-nda Aqmescitniñ Kyiv rayonı mahkemesi «Hizb ut-Tahrir işi»niñ üç figurantı – Ernes Ametov, Marlen Asanov ve Server Zekiryayevqa apis muddetini martnıñ 9-na qadar uzattı.

Qırım Rusiye tarafından ilhaq etilgen soñ yarımadada mustaqil jurnalistler, tsivil cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde ketken sayın daa sıq surette kütleviy tintüvler yapıla.

Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletleriniñ bir İslam hilâfeti içinde birleştirilmesi, dep köstereler. Lâkin olar buña irişmek içün terroristik usullarnıñ qullanıluvını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.

XS
SM
MD
LG