Ukrainanıñ Vaqtınca işğal etilgen territoriyalar ve devlet içinde mecburen köçken şahıslarnıñ meseleleri boyunca nazirligi Qırımda Almaniya şirketlerinden DHL Express, Adidas ve Pumanıñ qanunsız çalışqanlarını bildire.
Bu, dekabrniñ 6-nda muessiseniñ saytında bildirile.
«Mezkür çetel şirketleriniñ (DHL Express, Adidas ve Pumanıñ) Qırımda çalışması, 2014 senesi martnıñ 27-nde BMT Baş Assambleyası tarafından qabul etilgen Ukrainanıñ topraq bütünligi aqqında qarar ile közde tutulğan tanımama siyasetine zıt kele ve Avropa Birligi tarafından Rusiyege qarşı alınğan sıñırlav tedbirlerini (sanktsiyalarnı) boza», – denile bildirüvde.
Bildirüvde, nazirlik «munasip akimiyet organlarına Ukrainanıñ serbestligi, devlet mustaqilligi, telükesizligi ve topraq bütünliginiñ qorçalavına doğrultulğan qanuniy tedbirlerniñ alınması kerekligi boyunca muracaat etti», denile.
Nazirlik, qabaatlavlarını tasdiqlamaq içün ilhaq etilgen Qırımda mezkür şirketlerge ait tükânlar ve temsilciliklerniñ adreslerini bildirdi.
Daa evel DHL Express şirketiniñ matbuat hizmeti, DWniñ Rusiye tarafından ilhaq etilgen Qırımda faaliyeti aqqında sualine cevap olaraq, şirket özüniñ global poçta ve logistika ağına hizmet bergende sert bir şekilde ticaret qanunlarına riayet ete, degen edi.
Adidas ve Puma şirketleri açıq menbalarda bu hususta izaat bermediler.
Bu yılnıñ sentâbr ayında Avropa Birliginiñ Şurası, Rusiye ve separatistlerniñ vekilleri olğan 149 fizikiy şahıs, ve Ukrainada topraq bütünligi ve mustaqilliginiñ bozuluvına alâqası olğan 38 uquqiy şahısqa qarşı qabul etilgen sanktsiyalarnıñ qullanılmasını 2018 senesi martnıñ 15-ne qadar devam ettirdi.
AB sanktsiyalarınıñ bundan evelki aynı bunıñ kibi yarım yılğa uzatılması, 2017 senesi martnıñ 13-nde yapılğan edi.
Ağustosnıñ 4-nde bu cedvelge Rusiyeniñ daa üç fizikiy şahsı ile daa üç uquqiy şahıs qoşuldı. Bu, ABniñ, Siemens şirketi turbinalarınıñ sanktsiyalarğa rağmen ilhaq etilgen Qırımğa ketirilmesine qarşı reaktsiyası oldı.
Cedvelge kirgenlerniñ episine Avropa Birligine kiriş yasaq ve Avropa banklarında aktivleri tapılsa, buzlatılmaq kerekler.
