İlhaq etilgen Qırımda arheologlar, kütleviy idam yerinde bulunğan ve tahminlerine köre Altın Ordu devrine ait olğan mezar taptılar. Bunı dekabrniñ 6-sında TASS agentligine Rusiye Arheologiya institutındaki Klassik arheologiya bölüginiñ ilmiy hadimi Sergey Vnukov bildirdi.
«Başı qılıçnen kesilgen adamlarnıñ kemiklerinen tam manada nıqtalıp toldurılğan eki endek tapıldı – cemi, kesilüv izi olğan 70-ten ziyade insan qalımtısı… Episinde qafa tasları yoq, endekke abul-qubul atılğanlar. Bu, esirlerniñ kütleviy idamı qurbanları. Bizler içün bu, adden tış bir manzaradır», – dep, ketire Vnukovnıñ sözlerini TASS.
Mezarnıñ daa doğru peyda oluv vaqtı, insan qalımtılarınıñ radiouglerod (radiokarbon) talili esasında tayin etilecektir, dedi alim TASSqa.
Mezar, Bağçasaray rayonında, «Tavriya» trassası keçecek yerlerniñ tetqiq etilüvi esnasında tapılğan edi, dep yaza agentlik.
Rusiye kontroli altında bulunğan Qırım avtomobil yolları hizmeti ile iş yapıcı taraf olğan Vologda şeerinden VAD şirketi arasında «Tavrida» avtomobil yolunıñ quruluvı boyunca 137 milliard rublelik (qararnen 54 milliard hrivnalıq – QA) kontrakt imzalandı.
Satın aluv vesiqasında, söz Keriç – Kefe – Qarasuvbazar – Aqmescit – Bağçasaray – Aqyar avtomobil yolunuñ quruluvı ve ğayrıdan yapıluvı aqqında yürütile, dep bidirilmekte.
Qırımda «Tavrida» avtomobil yolunıñ quruluvı başlağanı aqqında haber bu yılnıñ mayısında bildirildi. «Tavrida» trassasınıñ qullanuvğa teslim etilüvi 2018 senesine planlaştırılğan edi, lâkin Rusiye kontroli altında bulunğan Qırım avtomobil yolları hizmetiniñ yolbaşçısı Aleksandr Mohna, qurucılıq müddetiniñ eki yılğa uzatılğanını bildirdi.
2017 senesi ağustosında Rusiye baş naziri Dmitriy Medvedev, «Tavrida»nıñ qurucılığına 14,36 milliard rubleniñ (qararnen 6,5 milliard hrivnanıñ – QA) ayırılacağını közde tutqan büdjetniñ 2018 senesi ve 2019-2020 seneleri müddetine masrafları boyunca buyruqnı imzalağanını bildirdi.
