Ukraina prezidenti Petro Poroşenko dekabrniñ 6-nda qırımtatarlarnı qırımtatar halqı Birinci Qurultayınıñ 100-yıllığınen hayırladı.
O, Birinci Qurultay Qırım ve bütün Ukraina tarihında müim bir adım olğanını qayd etti.
«İlk toplaşuv açılış tedbirinde (Birinci Qurultayda - QA) ukrain Merkeziy Radasınıñ eyeti iştirak etkeni pek muim. Bolşevikler terror başlataraq, ilân etilecek cumhuriyet hayalını taptap taşlağan olsa bile, Birinci Qurultay Qırım ve bütün Ukraina tarihında muim bir adım olğandır. Qırımnıñ Rusiye tarafından yapılğan al-azırdaki ilhaqı, Rusiyeniñ bir daa imperiya arzu yaşağanını kösterip, Ukraina devletine sadıq qalğan qırımtatarları, ukrainler ve başqa millet vekillerine qarşı duşmanlıq ve qorqıtuv, basqı ve repressiyalar ketirdi», – degen prezidentniñ sözlerini, onıñ Yuqarı Radaki temsilcisi İrina Lutsenko oqup berdi.
Poroşenko Ukraina «mustaqilligi, topraq bütünliginiñ tiklenmesi ve Rusiye işğal etip alğan territoriyalarda öz vatandaşlarını imaye etilmesi içün büyük küç-quvet sarf etkenini» hatırlattı.
«Biz tecavuzcını cezalamaq maqsadınen BMT, halqara cinayet mahkemesi, diger Avropa ve halqara teşkilâtlarğa muracaat etip, birinci nevbette siyasiy usullarnen halqara seviyede areket etmektemiz. Qırımda, mustaqil ukrain devletine bağlı qırımtatar milliy muhtariyeti qurulmasınen bağlı işler başlatıldı», – denilmekte ukrain prezidentiniñ muracaatında.
Dekabrniñ 6-nda Ukraina Yuqarı Radasında qırımtatar halqı Birinci Qurultayınıñ 100-yıllığına bağışlanğan tantanalı oturışuv ötkerildi.
Daa evel Ukraina informatsion siyaset nazirligi ealige Qurultay ne olğanı ve qırımtatar milliy areketi içün onıñ tarihiy emiyeti aqqında ikâye etmek maqsadınen media kampaniyası başlatqan edi.
Qırımtatar halqınıñ Qurultayı -bir milliy qurultay olaraq, qırımtatar halqınıñ yüksek temsiliy organı sayıılmaqta.
1917 senesi dekabr ayında qırımtatar halqınıñ Qurultayı mavı tüstesi milliy bayrağını, Qırım hanlarınıñ taraqlı altın tamğa şeklindeki tuğrası ve milliy gimnini tasdıqlağan edi.
