Ukraina Yuqarı Radasınıñ yolbaşçısı Andriy Parubiy qırımlılarğa muracaat eterek, Ukraina akimiyeti ilhaq etilgen yarımadanıñ sakinlerini unutmağanı ve olar «özüniñ büyük ukrain qorantasına qaytacağı» aqqında beyan etti.
Bu aqta o, dekabrniñ 6-nda Ukraina Yuqarı Radasında qırımtatar halqı Birinci Qurultayınıñ 100-yıllığına bağışlanğan tantanalı oturışuvda söz yürsetti.
«Ürmetli Qırım sakinleri, biz sizlernen berabermiz, sizlerni unutmaymız ve men Qırım Ukrainağa ait olğanı içün o evine, büyük ukrain qorantasına qaytacağından eminim», – dedi Parubiy.
Onıñ sözlerine köre, «Qırımnıñ 1918 yıldaki ilhaqınen zemaneviy ilhaqı arasında iç bir farq yoq».
«O devirdeki ve zemaneviy ilhaq – qorqu, terror ve qorqızuvdır. Ukrainler ve qırımtatarları taqip altında. O devirde işğalciler qırımtatar halqınıñ Qurultayını dağıtqan olsa, şimdi – qırımtatar Meclisini dağıta. Ukrain askerleri o devirde yani 1918 senesi azat etken kibi, bizler Qırımnı şimdide azat etecekmiz», – dep söyledi Parubiy.
Dekabrniñ 6-nda Ukraina Yuqarı Radasında qırımtatar halqı Birinci Qurultayınıñ 100-yıllığına bağışlanğan tantanalı oturışuv ötkerile.
Daa evel Ukraina informatsion siyaset nazirligi ealige Qurultay ne olğanı ve qırımtatar milliy areketi içün onıñ tarihiy emiyeti aqqında ikâye etmek maqsadınen media kampaniyası başlatqan edi.
Qırımtatar halqınıñ Qurultayı - bir milliy qurultay olaraq, qırımtatar halqınıñ yüksek temsiliy organı sayıılmaqta.
1917 senesi dekabr ayında qırımtatar halqınıñ Qurultayı mavı tüstesi milliy bayrağını, Qırım hanlarınıñ taraqlı altın tamğa şeklindeki tuğrası ve milliy gimnini tasdıqlağan edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü olaraq qabul etti.
