Link açıqlığı

Sabıq Qırım deputatı Ganışnıñ devletke hainligi boyunca işi dekabrniñ 26-nda mahkeme oturışuvında baqılacaq – advokat


Vasiliy Ganış

Kyivniñ Dnepr rayonı mahkemesinde dekabrniñ 26-nda sabıq Qırım deputatı Vasiliy Ganışnıñ işi boyunca oturışuvnıñ ötkerilmesi planlaştırıla. Bunı Qırım.Aqiqatqa advokat Andrey Rudenko söyledi.

«Bundan soñki oturışuvda qabaatlav tarafından ve bizim taraftan taqdim etilgen birer videonı baqacaqmız. Ondan ğayrı yazılı delillerni tetqiq etecekmiz. Vaqıt qalsa, belki munaqaşalar da olur», – dep izaladı advokat.

Vasiliy Ganışnıñ işi boyunca mahkeme eki yıldan ziyade devam ete. Soñki oturışuvı 2017 senesiniñ iyuninde olıp keçti, dep hatırlattı advokat.

2017 senesi fevralniñ 22-nde Ukrainanıñ Yuqarı adliye şurası, Vasiliy Ganışnıñ işi boyunca kollegiyası başında turğan akem Aleksey Fedükni becergen vazifesinden azat etti. İşten çıqarılmasınıñ sebebi, Avromeydan zamanında narazılıq areketleriniñ eki faaliyetçisine qarşı bergen tevqif qararı oldı. Bu sebepten Kyivniñ Dnepr rayonı mahkemesi aperlniñ 5-nde Ganışnıñ işini ğayrıdan baqıp başladı.

Sabıq deputat 2015 senesi aprelinde Qırımdan Ukrainanıñ qıtadaki qısmına kirgende onı SBU ve Ukraina Devlet sıñır hizmetleriniñ hadimleri birlikte yaqaladılar. Sabıq deputat araştırılmaqta edi. Ukrainanıñ Baş prokuraturası onı devletke hainlik etüv boyunca şübheli ilân etti.

Ukrainanıñ tahqiqatçıları Ganışnı, Qırımnıñ statusı boyunca «referendum»nıñ ötkerilmesi içün rey berilgende oturışuvda bulunıp, onda kvorum yarattı ve böylelikle Ukrainanıñ topraq bütünligine qarşı doğrultılğan areketlerge qoltuttı, dep qabaatlaylar. Ondan ğayrı siyasetçi, 2014 senesi aprelniñ 11-nde yarımadadaki Rusiyege tabi parlamentniñ meclisinde Qırımda Rusiye anayasasınıñ qabul etilmesi içün rey bergeninde qabaatlana.

Sabıq deputat özü, Qırım parlamentiniñ zalında «referendum»nıñ ötkerilmesine qarşı rey bergen yekâne kişi olğanını bildire. Onıñ fikrine köre, devletke hainlik boyunca qabaatlanması esassızdır.

XS
SM
MD
LG