Link açıqlığı

Celâl: «çetel agenti» KHVnen bağlı qanun Rusiye prezidenti saylâvından evel informatsion meydannı temizlemek maqsadınen yapıldı


Nariman Celâl

Kreml Rusiye prezidentiniñ saylâvından evel «çetel agenti» qanunı yardımınen informatsion meydannı temizley dep saya, qırımtatar milliy areketiniñ faali Nariman Celâl. Böyle bir fikirni o Qırım.Aqiqat Radiosı efirinde beyan etti.

«Çetel jurnalistleriniñ imkânlarını sıñırlayaraq, (Rusiye akimiyeti – QA) bazılarına nisbeten yımşaq davranacaq, bloger ve cemaat jurnalistleri kibi digerlerini ise, olmağan hatalarda qabaatlap, cöreme yazıp, apiske qapatacaq. Şimdi Qırımda bu artıq yapılıp tura», – dep saya faal.

Rusiye adliye nazirligi dekabrniñ 5-nde Avropa Azatlıq Radiosı/Azatlıq Radiosı (РСЕ/РС),«Nastoyaşeye vremya» telekanalı, Azatlıq Radiosunuñ tatar-başqırd hızmeti (Azatliq Radiosi, «Idel.Aqiqat», «Faktograf», «Kavkaz.Aqiqat» Qırım.Aqiqatnı«çetel agenti» cedveline kirsetti.

Rusiye prezidenti Vladimir Putin noyabrniñ 25-nde Federatsiya Şurası tarafından qabul etilgen KHVnen bağlı «çetel agenti» qanunını imzaladı. Bu qanunğa istinaden Kreml, çetel haber vastalarınıñ maddiy yardım menbalarını açıp bermesi istemege ve rusiyeli seyircige bu şekildeki haberni azırlağan malümat menbalarını «çetel agenti», dep tanımağa imkân bere.

Rusiyedeki KHV faaliyetiniñ sıñırlanmasınen bağlı qarar, Rusiye tarafından finansirlengen RT telekanalında ABD akimiyetiniñ ABDde «çetel agenti» sıfatında qayd olması talabına cevap bergenini ilân etken soñ peyda oldı.

Washington ABD havfsızlıq hızmetleri bıltır keçirilgen prezident saylâvlarında ABD saylâvcılarına tesir etmek içün devlet KHV faydalandı degen hulâsağa kelgeninden soñ, böyle bir adım atmağa mecbur qala. Moskva bunı defalarca inkâr etti.

ABD Devlet departamenti, ABDniñ «çetel agenti» qanunı Rusiyedeki soyundan pek farqlı olğanı ve informatsiya serbestligini sıñırlamağanı aqqında beyan etti.

Rusiye adliye nazirligi daa evel Qırım.Aqiqat Azatlıq Radiosı leyhasına işiniñ sıñırlanabileceginen bağlı tenbiyelev yollağan edi.

Avropa Azatlıq Radiosı/Azatlıq Radiosı korporatsiyası öz beyanatında – Rusiye ükümeti tarafından çetel KHV qarşı nasıl tedbirler kirsetilecegi ve işbu tedbirler media teşkilâtına nasıl tesir etecegini tahmin etmekten çekingen edi.

Avropa Azatlıq Radiosı/Azatlıq Radiosı korporatsiyasınıñ maqsadı - dünyadaki çeşit devletlerde, şu cümleden Rusiyede de, oquyıcı ve seyircilerge doğru ve halis malümat taqdim etmekten ibaret olğanını qayd ete. «Bizler muhbirlik işimizni devam etecekmiz», – denilmekte beyanatta.

XS
SM
MD
LG