Noyabrniñ 23-nde Aqmescitte Kremlniñ kontroli altında bulunğan Qırım Yuqarı mahkemesiniñ zalında Türkiye vatandaşından «aqsız yerde para talap etüv işi» boyunca qabaatlanğan qırımtatar faaliyetçisi Bekir Degermenci yaramadı. Oña «acele yardım» çağırıldı.
Degermenciniñ tevqif etilüvine qarşı berilgen şikâyet boyunca mahkeme oturışuvı öyle de başlanmadı, dep bildire Qırım.Aqiqat muhbiri.
Onıñ malümatına köre, faaliyetçini «acele yardım» maşinasına alıp barıp, oksigen (kislorod) apparatına bağladılar.
Bu «iş»niñ daa bir figurantı olğan Ruslan Trubaçnıñ tevqifine qarşı berilgen şikâyet boyunca mahkeme oturışuvı başlandı.
Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladı. Rusiye FSBsiniñ Qırım boyunca idaresi yaqalanğan faaliyetçilerni Türkiye vatandaşından «aqsız yerde hususan büyük miqdarda para talap etüv»de qabaatlay.
Qırımtatar faaliyetçileriniñ işbu yaqalanuvı esnasında qırımtatar milliy areketiniñ veteranı Veciye Kaşka yaramadı. Adiseniñ yüz köstergen yerinden onı «acele yardım» alıp ketti. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ kontroli altında bulunğan Aqmescitteki Kyiv rayonınıñ mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apiste qaldırdı.
Dekabrniñ 5-nde Aqmescitteki mahkemeler noyabrniñ 23-nde Aqmescitte Türkiye vatandaşından «aqsız yerde para talap etüv işi» boyunca yaqalanğan qırımtatar faaliyetçileri Kâzim Ametov ve Asan Çapuhnı muvaqqat izolâtorda tutmaq qararını deñiştirmeyip qaldırdılar.
Qırımda Rusiyeniñ ilhaqından soñ mustaqil jurnalistler, tsivil cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde ketken sayın daa sıq surette kütleviy tintüvler yapıla.
