Qırımlı advokat Mammet Mambetov Aqmescitte, «narazılıq meydanı»nıñ faali Fazıl İbraimovnıñ evinde nevbetteki tintüv yapılğanı aqqında haber ete.
Bu aqta uquqqorçalayıcı Qırım.Aqiqatqa bergen izaatında haber etti.
«Qırım saati boyunca saba saat 6da (Kyivde saat 7 – QA) maña onıñ qadını telefon açıp, olarnıñ evininde tintüv yapılğanı aqqında haber etken arada, bağ kesildi», – dep ikâye etti advokat.
O, bergen malümatqa köre, tintüv tahminen Aqmescitniñ Abdul Teyfuq soqağında ötkerilmekte.
«Qırım birdemligi» cemaat teşkilâtı haber etkenine köre, tintüv keçken yerde avtozaglar tura eken.
Rusiye küç idaresi bu hususnen bağlı iç bir izaat bermey.
Qırım.Aqiqat meseleniñ inceliklerini bilmege areket ete.
Advokat Mambetovnıñ malümatına köre, 2017 senesi oktâbr ayında, Rusiye küç idaresiniñ hadimleri yañlışlıqnen «narazılıq meydanı»nıñ 62-yaşındaki faali Fazıl İbraimovnıñ oğlu Enverniñ evinde tüntüv keçirgen ediler.
Fazıl İbraimov «Strelkovaya» yerli «narazılıq meydanı»nıñ faali sayıla.
Kreml nezaretindeki Aqmescitniñ Jeleznodorojnıy rayon mahkemesi bu yıl avgust ayında 62-yaşındaki İbraimovnı 5 künlük apiske qapağan edi.
İbraimov «Krımskaya roza» mesken massivi qurulışınen bağlı cemaat deñlevlerinde çıqış yapmağa istey. Ancaq, Rusiye nezaretindeki Aqmescit memuriyetiniñ yolbaşçısı Gennadiy Baharev oña söz aqqı bermeyip, politsiyağa faalniñ zaldan çıqarılmasını rica ete. Ufaq bir dava çıqa ve bundan soñ İbraimov «politsiyanıñ qanuniy talabına riyayet etmemekte» qabaatlana.
Tevqif etilüvnen bağlı tavsilâtlı malümatnı Qırım.Aqiqat materiallarında tapıp oquybilesiñiz.
«Krımskaya roza» yañı mesken massivi Aqmescitniñ şimaliy-şarqiy tarafında qurulması planlaştırıla. Onıñ qurulışını «Monolit» qurucılıq şirketi tanıtqan edi. Qurucı vaad etkenine köre, yañı rayonda 9 biñ kvartira qurulacaq eken. Bu yerde çoq yıllar devamında yaşap kelgen insanlar evlerni yıqmaq niyetindeler. Ekspertler aytqanına köre, «Krımskaya roza» mikrorayonıñ proyekti yanlış yapılğan eken.
