Front Line Defenders halqara uquqqorçalayıcı teşkilât Rusiye mahkemesiniñ qırımlı uquqqorçalayıcı Emir-Usein Kukunıñ qomşu Rusiyege yollanacağınen bağlı qararını takbih etti. Bu hususta Qırım.Aqiqatnıñ muarrirliginde bulunğan teşkilâtnıñ resmiy yollanmasınıñ metininde söz yüresetilmekte
Front Line Defenders Emir-Usein Kukunıñ qomşu Rusiyege yollanuvı – ailesinen bağlanmasına zorlaştıracağı içün, onıñ aqlarınıñ bozulması, dep saya. Uquqqorçalayıcılarnıñ fikrine köre, Kukuğa nisbeten azırlanğan qabaatlav, onıñ sadece Qırımda insan aqları bozulmasinen bağlı esabatlar azırlaması içün yapqan barışıqsever ve qanuniy işine bir cevap olaraq azırlanıp başlatıldı.
Dekabrniñ 4-nde, Aqmescitte Rostov bölge arbiy mahkemesi keçirgen köçme oturışında, «Yaltalı Hizb ut-Tahrir işi» niñ figurantaları Muslim Aliyev, Emir-Usein Kuku, Vadim Siruk, Enver Bekirov, Refat Alimov ve Arsen Cepparovnıñ apiste qaluv müddeti 2018 senesi mayısnıñ 27-sine qadar uzatıldı.
«Yaltalı altı kişi» işinen bağlı taqiqat bitti. Yaqın vaqıtta Şimaliy-Kavkaz bölge arbiy mahkemesi davanı baqmağa kirişecek. Yaqın künlerde qabaatlanğan şahıslarnı Rostov-na-Donu şeerine keçirmek niyetindeler.
«Yaltalı Hizb ut-Tahrir (qomşu Rusiye ve ilhaq etilgen Qırımda yasaqlanğan teşkilât) işi»niñ fiqurantları Arsen Cepparov ve Refat Alimov 2016 senesi aprelniñ 18-nde Qızıltaşta (Krasnokamenkada) tevqif etilgen soñ apiste tutulmaqtalar. «Yaltalı Hizb ut-Tahrir işi» boyunca qabaatlanğanlarnıñ ilk dördü 2016 senesi fevralniñ 11-nde tevqif etildi. Bular arasında - İnsan aqları boyunca Kontakt gruppasınıñ azası Emir-Useyin Kuku, qurucılar olıp çalışqan Aluşta sakini Muslim Aliyev ile Qızıltaş köyüniñ sakini Enver Bekirov ve Yaltada yaşağan çiçek satıcısı Vadim Siruk.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep saya. Advokat Emil Kürbedinovnıñ qayd etkenine köre, Rusiye uquqqoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleridir.
