Link açıqlığı

«Para talap etüv işi» boyunca yaqalanğan faaliyetçi Asan Çapuh açlıq ilân etti


Aqmescitte Asan Çapuhnıñ yaqalanuvı, 2017 senesi noyabr 23 künü

Noyabrniñ 23-nci künü Aqmescitte Türkiye vatandaşından «aqsız yerde para talap etüv işi» boyunca yaqalanğan Asan Çapuh, dekabrniñ 6-sından açlıq başlağanını ilân etti.

Bunı o, yaqalanğanlarnıñ tevqif etilgenlerine şikâyetlerini baqqan Kremlniñ kontroli altındaki Qırım Yuqarı mahkemesiniñ oturışuvı esnasında söyledi, dep bildire Qırım.Aqiqat muhbiri.

Çapuh, muvaqqat izolâtorda tevqif etilmesine dair mahkeme qararı deñiştirilmegeni içün açlıq ilân etkenini bildirdi. O, ev apisine yiberilmesini talap ete edi.

«Men yaqalanğanımdan berli bir kere bile yuvunmadım, apis şaraiti pek fena: divarlar dımlı, er yer mantar, mende qan basımı atlay. Meni ev apisine yibermeseñiz, yarın açlıq başlaycam», – dedi Çapuh.

Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatarlarnı yaqaladı. Rusiye FSBsiniñ Qırım boyunca idaresi yaqalanğan faaliyetçilerni, Türkiye vatandaşından «aqsız yerde hususan büyük miqdarda para talap etüv»de qabaatlay.

Qırımtatar faaliyetçileriniñ işbu yaqalanuvı esnasında qırımtatar milliy areketiniñ veteranı Veciye Kaşka yaramadı. Adiseniñ yüz köstergen yerinden onı «acele yardım» alıp ketti. Daa soñra qadınnıñ vefat etkeni belli oldı.

Noyabrniñ 24-nde Rusiyeniñ kontroli altında bulunğan Aqmescitteki Kyiv rayonınıñ mahkemesi yaqalanğan Kâzim Ametov, Asan Çapuh, Ruslan Trubaç ve Bekir Degermencini 2018 senesi yanvarniñ 15-ne qadar apiste qaldırdı.

Qırımda Rusiyeniñ ilhaqından soñ mustaqil jurnalistler, tsivil cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde ketken sayın daa sıq surette kütleviy tintüvler yapıla.

XS
SM
MD
LG