Qomşu Rusiyede prezident saylavına qatılmaq istegenini bildirgen televizion alıp barıcısı Kseniya Sobçak, 2014 senesi martnıñ 16-sında ötkerilgen Qırım statusına dair «referendum»nıñ «sahte bir rey berüv» olğanını bildirdi.
Bunı o, Rusiye televideniyeniñ canlı efirinde söyle, dep bildire «RİA Krım» agentligi.
«Bu, sahte bir rey berüv edi. Kerçek rey berüv bir sualnen olmaz. Siz sabadan konyak içesizmi? Bu, referendum içün sual degil. Qırımda közeticiler ile kerçek bir halqara referendumı ötkerilmek kerek. Ve Qırım sakinleri, qayda olmaq istegenlerine özleri qarar bermek kerekler», – dep, ketire Sobçaknıñ sözlerini agentlik.
Haber agentligi, Sobçaknıñ, bir suali degil de, üç suali olğan yañı bir «referendum»nıñ keçirilmesini teklif etkenini bildire.
«Rusiyeniñ bir qısmı olmaq isteysizmı? Ukrainanıñ bir qısmı olmaq isteysizmi? Ya da – mında bizni büyük sürprizler bekley bile – belki siz asıl da mustaqil olmaq isteysizmi? Pek çoq kişiler, misal içün, qırımtatarlar, Qırımnı, belki de, mustaqil körmek isteyler. Lâkin bu, bizim işimiz degil», – dep, ketire Sobçaknıñ sözlerini agentlik.
Kseniya Sobçak oktâbrniñ 18-nde prezident saylavına qatılmaq istegenini resmen bildirdi. O, özüne «er keske qarşı» namzet, dey.
Sobçak, ilhaq etilgen Qırımda saylavdan evelki teşviqat kampaniyasını yapmaycağını söyledi. O, Rusiye Qırımnı ilhaq etip, halqara mecburiyetlerini bozdı, dep bildirdi. Onıñ fikrine köre, ilhaq cümleden Rusiye ealisiniñ faqirleşkenine ketirdi.
Ondan ğayrı Kseniya Sobçak ilhaq etilgen Qırımda yarımadanıñ statusına dair «yañı mustaqil referendum»nı ötkermege teklif etti.
Daa soñra Sobçak, Rusiye Baş prokuraturası onıñ Qırım aqqında söylegenlerini teşkere, dep ilân etti.
Rusiye prezidentiniñ saylavını 2018 senesi martnıñ 18-nde – Qırım ilhaqınıñ yıllığında ötkermek planlaştıralar. Daa evel saylav kününiñ başqa künge keçirilmesini közde tutqan munasip qanun, Rusiyeniñ Devlet duması ile Fedratsiya Şurası tarafından tasdiqlanıp, Rusiye prezidenti Vladimir Putin tarafından imzalandı.
İlhaq etilgen Qırım territoriyasında da rey berilecek olsa, Ukraina 2018 senesinde ötkerilmesi planlaştırılğan prezident saylavını, tıpqı daa evel keçirilgen Devlet dumasına saylavlarını kibi tanımaz.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
