Link açıqlığı

Ukrain göñüllileri mukâfatı Qırımğa, apiske alınğan Marlen Asanovnıñ ailesine yollanacaq - Bariyev


Faaller Qırımda Rusiyeniñ küç idaresiniñ hadimleri tarafından tutulğangöñülli Marlen Asanovnıñ ailesine, o dekabrniñ 1-nde Göñülliler mukâfatınıñ laureatı olğan «Euromaydan SOS» eykelçigive hatıra diplomını yollamağa azırlana. Bu aqta Qırım.Aqiqatqa Qırımtatar resurs merkezi idaresiniñ yolbaşçısı Eskender Bariyev ikâye etip berdi.

«Mukâfatnıñ maqsadı - hayır işlegen insanlarğa diqqat çekmekten ibaret. Bu yıl 104 namzet bar edi. Men bellesem, olarnıñ epsi buña lâyıq edi, lâkin eñ eyisi olaraq Marlen Asanovnıñ saylânması, bizim içün daa da hoş bir vaqia oldı. Bu mukâfat sayesinde insanlar, böyle insanlarnıñ iş ve areketleri dünyanı eyileştirgenini añlaycaqlar. Marlen Asanon ailelerge yardım eterek, özü de FSBniñ apsine tüşti ve terrorizmde qabaatlanmaqta. Mında biz biri-birine zıt kelgen manzara şaatı olamız: işğalcilerniñ onı terrorist dep kösterecek ola, diger taraftan ise – körgen ve oña göñülli olğanı içün qol tutqan aqıl ferasetli insanlarnı köremiz», – dey Bariyev.

Mukâfat teşkilâtçılarnıñ qayd etkenine köre Marlen Asanov, manialarğa bağmadan göñüllilerniñ faaliyeti ve faal pozitsiyasına sadaqat köstergen nümüne olacaq şahıslardan biridir.

«Marlen Asanov – bir qırımtatarı olaraq, qırımlı siyasiy mabüs olğanları sebebinden ailesiniñ ihtiyacını teminleycek babasız qalğan 100 balanıñ ailesine qol tutqan birisi», - denilmekte «Euromaydan SOS» haberinde.

Oktâbrniñ 12-nde işğal altındaki Qırımda küç idaresiniñ hadimleri Bağçasaraynıñ altı sakini olğan Timur İbragimov, Marlen (Suleyman) Asanov, Memet Belâlov, Seyran Saliyev, Server Zekiryayev ve Ernest Ametovnı tevqif etken edi. FSB olarnı Rusiye ve ilhaq etilgen Qırımda yasaqlanğan «Hizb ut-Tahrir» azaları olğanında qabaatlay.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep saya. Advokat Emil Kürbedinovnıñ qayd etkenine köre, Rusiye uquqqoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleridir.

«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.

Qırım işğalinden soñ yarımadada mustaqil jurnalistler, cemaat ve qırımtatar milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.

XS
SM
MD
LG