Link açıqlığı

«Yaltadaki Hizb ut-Tahrir işi» boyunca qabaatlanğanlarnı qomşu Rusiyege yollamağa azırlaylar – yaqalanğannıñ apayı


Meryem Kuku

«Yaltadaki Hizb ut-Tahrir işi» figurantlarını,işlerini okrugnıñ arbiy mahkemesinde baqmaq içün bu künlerde Qırımdan Rusiyeniñ Rostov-na-Donu şeerine yollaycaqlar, dep bildirdi Qırım.Aqiqatqa tevqif etilgen Qırım aq-uquq qoruyıcısınıñ ömür arqadaşı Meryem Kuku.

«Bizde iç bir türlü hayal qalmadı. Bu mahkeme sistemasınıñ keri qaytuv yolu olmağanını ve ne advokatlar, ne de qabaatlanğanlar tarafından ketirilgen dellilerniñ esapqa alınmağanını bilemiz. Akem, yaqın vaqıtta yollanacaqlarını ayttı. Añlağanımız qadar mahsus cedvel bar. Birinci yollav çarşenbe künü olacaq. Belki de olarnı endi yollarlar», – dedi yaqalanğannıñ apayı.

Emir-Useyin Kukunıñ qorantası babalarınen körüşüvge azırlana. Yollavdan evel olsun dep, salı künü körüşmek isteyler.

Dekabrniñ 4-nde Aqmescitte Rostov okrugı seyyar mahkemesiniñ oturışuvında mahkeme «Yaltadaki Hizb ut-Tahrir işi» figurantlarınıñ tevqif müddetini 2018 senesi mayıs 27-sine qadar uzattı.

Tevqif müddeti Muslim Aliyev, Emir-Useyin Kuku, Vadim Siruk, Enver Bekirov, Refat Alimov ve Arsen Cepparovğa uzatıldı.

«Yaltadaki altılıq»nıñ işi boyunca tahqiqat tamamlandı. Yaqın vaqıtta Rostov okrugınıñ arbiy mahkemesi işniñ özüni baqıp başlaycaq. Azırlıq mahkeme oturışuvınıñ vaqtı ve yeri, dekabr 11 künü saat 10:00 (Kyivniñ vaqtı boyunca 09:00) Rostov okrugınıñ arbiy mahkemesi olaraq tayin etildi.

Yaltadaki «Hizb ut-Tahrir (qomşu Rusiye ve ilhaq etilgen Qırımda yasaqlanğan teşkilât) işi»niñ fiqurantları Arsen Cepparov ve Refat Alimov 2016 senesi aprelniñ 18-nde Qızıltaşta (Krasnokamenkada) tevqif etilgen soñ apiste bulunalar. Yaltadaki «Hizb ut-Tahrir işi» boyunca qabaatlanğanlarnıñ ilk dörtü 2016 senesi fevralniñ 11-nde tevqif etildi. Bular: İnsan aqları boyunca alâqa grubunıñ azası Emir-Useyin Kuku, qurucılar olıp çalışqan Aluşta sakini Muslim Aliyev ile Qızıltaş köyüniñ sakini Enver Bekirov ve Yaltada yaşağan çiçek satıcısı Vadim Siruk.

«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi diniy alâmetine köre yapıla, dep sayalar. Advokat Emil Qurbedinov, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruplarğa ait Qırım sakinleri olğanını qayd ete.

Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletleriniñ bir İslam hilâfeti içinde birleştirilmesi, dep köstereler. Lâkin olar buña irişmek içün terroristik usullarnıñ qullanıluvını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.

Qırım Rusiye tarafından ilhaq etilgen soñ anda mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG