Link açıqlığı

Advokatlar «Yaltadaki Hizb ut-Tahrir işi» figurantlarına tevqif müddetiniñ uzatılğanına qarşı mahkemege şikâyet etmek niyetindeler


Advokat Aleksey Ladin

Advokatlar Rostov okrugı arbiy mahkemesiniñ «Yaltadaki Hizb ut-Tahrir işi» figurantlarına tevqif müddetini yarım yılğa uzatqanına qarşı mahkemege şikâyet etmek niyetindeler. Bunı dekabrniñ 4-nde Qırım.Aqiqat içün bergen izaatta aq-uquq qoruyıcısı Emir-Useyin Kukunıñ advokatı Aleksey Ladin bildirdi.

«Netice sıfırğa doğru inkişaf etkenini pek yahşı añlayım, lâkin bu, nevbetteki mahkeme maqamları ve bu cümleden İnsan aqları boyunca Avropa mahkemesi içün qararnıñ esassız olğanını munasip şekilge ketirip köstermek içün kerek… Bu oturışuvda qanun talapları formal şekilde bile yerine ketirilmedi: qabaatlavnıñ temsilcisi müddetniñ uzatılmasını soradı, amma er angi deliller aqqında bir söz bile aytalmadı», – qayd etti advokat.

Mahkeme, «azatlıqtan marum etüv şekliniñ deñişmesine dair iç bir hayal içün yer olmağanını» kösterip,mümkün olğanından eñ büyük müddetni tayin etti, dep ilâve etti Ladin.

Dekabrniñ 4-nde Aqmescitte Rostov okrugı seyyar mahkemesiniñ oturışuvında mahkeme «Yaltadaki Hizb ut-Tahrir işi» figurantlarınıñ tevqif müddetini 2018 senesi mayıs 27-ne qadar uzattı.

Yaltadaki «Hizb ut-Tahrir işi»niñ fiqurantları Arsen Cepparov ve Refat Alimov 2016 senesi aprelniñ 18-nde Qızıltaşta (Krasnokamenkada) tevqif etilgen soñ apiste bulunalar. Yaltadaki «Hizb ut-Tahrir işi» boyunca qabaatlanğanlarnıñ ilk dörtü 2016 senesi fevralniñ 11-nde tevqif etildi. Bular: İnsan aqları boyunca alâqa grubunıñ azası Emir-Useyin Kuku, qurucılar olıp çalışqan Aluşta sakini Muslim Aliyev ile Qızıltaş köyüniñ sakini Enver Bekirov ve Yaltada yaşağan çiçek satıcısı Vadim Siruk.

«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi diniy alâmetine köre yapıla, dep sayalar. Advokat Emil Qurbedinov, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd ete.

Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletleriniñ bir İslam hilâfeti içinde birleştirilmesi, dep köstereler. Lâkin olar buña irişmek içün terroristik usullarnıñ qullanıluvını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.

Qırımda Rusiyeniñ ilhaqından soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG