Kanada tış işleri naziri Chrystia Freeland dekabrniñ 7-8 künlerinde Venada 24-nci OSCE (OBSE) Nazirler şurasında iştirak etip, Qırımnıñ Rusiye tarafından ilhaqına ve insan aqlarına hususiy diqqatnı ayırmaq istey. Bu, dekabrniñ 3-nde Kanada Tış işleri nazirliginiñ saytında bildirile.
Degerliklerimiz ve menfaatlarımız kettikçe daa sıq dava etilgen dünyada Kanadanıñ Avropa ittifaqdaşlarınen ortaqlığı bugün er zamankinden daa muimdim. Men, Kanadanıñ halqara nizamı, demokratik ürriyetler ve transatlantik emekdaşlıq ile havfsızlıqnıñ tarafdarı olğanını tasdiqlamaq içün imkânını sabırsızlıqnen bekleyım», – dep ketire Freelandnıñ sözlerini Kanada tış işleri muessisesiniñ matbuat hizmeti.
Ondan ğayrı, dekabrniñ 4-nde Kanada Tış işleri naziri Brüsselde Kanada ve AB nazirleriniñ Umumiy komitetini ziyaret etmege planlaştıra ve dekabrniñ 5-6 künlerinde NATO ülkeleri tış işleri nazirleriniñ körüşüvinde iştirak etecek.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
