Advokatı Edem Semedlâyev yarımadada mahküm etilgen Qırımtatar Milliy Meclisi reisiniñ muavini İlmi Umerovnıñ Qırımdan qaysı bir emir esasında çıqarılğanı aqqında malümat edinmek maqsadınen, Kremlge nevbetteki malümat soratuvı yollamaq niyetinde.
Bu aqta o, dekabrniñ 4-nde Qırım.Aqiqatqa, Rusiye prezidentiniñ memuriyeti mütenasip vesiqalarnı bermekni red etkenini izaatlağanda ikâye etti.
«Bu küngece Umerovnıñ angi vesiqa esasında azat etilgeni, bügüngece sır olıp qalmaqta. Yekâne variant – Umerovnıñ mefa etilmesi, lâkin olar afsus ki, bunıñ sır ve sıñırlı olğanı sebep köstererek, biz istegen malümatnı bermediler. Şimdilik ne yapacağımıznı tüşünemiz ve yaqın kelecekte nevbetteki soratuvnı yollaycaq olamız», – dedi Semedlâyev.
2017 senesi noyabrniñ ortasında Qırım advokatı Edem Semedlâyev, imayesi altında bulunğan şahısnıñ aqları ve menfaatlarını qorçalamaq maqsadınen ariza yazıp, Qırımtatar Milliy Meclisi reisiniñ muavini İlmi Umerovnıñ Qırımdan qaysı bir emir esasında çıqarılğanını añlatmağa rica etken edi.
Qırımtatar Milliy Meclisi reisiniñ muavini İlmi Umerov Qırımda eki yıl yaşav tarzındaki koloniyada qaluv cezasına mahküm etilgen edi. Bunıñnen beraber, Umerovğa eki yıl devamında açıq faaliyetnen oğraşması ve kütleviy haber vastalarında çıqış yapması yasaqlandı.Umerov açıq menbalarda yapılğan separatizmge çağıruv yapmaqta qabaatlandı. O, oña qarşı açılğan cinaiy işni, siyasiy maqsatlı iş dep tanıy.
Rusiye akimiyeti, İlmi Umerovnı ve Qırımda mahküm etilgen qırımtatar halqınıñ liderlerinden biri olğan Ahtem Çiygoznı azat etip, oktâbrniñ 25-nde Türkiyege teslim etti. Daa soñra Umerovnen Çiygoz Kyivge keldiler.
