Dekabrniñ 4-nde Aqmescitte Rostov okrugı arbiy mahkemesiniñ seyyar oturışında prokuror «Yaltadaki Hizb ut-Tahrir işi» boyunca keçken figurantlar içün apis muddetiniñ yarım yılğa uzatılmasını soradı.
Bu, mahkeme oturışında belli oldı, dep bildire Qırım.Aqiqat muhbiri.
Onıñ malümatına köre, mahkemeniñ zalına 15-ke yaqın kişi – yaqın soylar yiberildi. Qabaatlanğanlarğa qoltutmaq içün 50 kişi keldi. Mahkemede yalıñız «Yalta işi»niñ iştirakçilerine tevqif müddetini uzatuv meselesi baqıla.
«İşte» teşkilâtçı olaraq keçken Muslim Aliyevniñ advokatı Sergey Legostov ev apisi soray.
Dekabrniñ 4-nde Aqmescitte Rostov okrugı arbiy mahkemesiniñ seyyar oturışında Rusiye ve onıñ tarafından ilhaq etilgen Qırımda yasaqlanğan Hizb ut-Tahrir teşkilâtınıñ «Yaltadaki işi» figurantları Muslim Aliyev, Emir-Useyin Kuku, Vadim Siruk, Enver Bekirov, Refat Alimov ve Arsen Cepparovnıñ apis muddetini yarım yılğa uzatuv meselesi baqıla.
Yaltadaki «Hizb ut-Tahrir işi»niñ fiqurantları Arsen Cepparov ve Refat Alimov 2016 senesi aprelniñ 18-nde Qızıltaşta (Krasnokamenkada) tevqif etilgen soñ apiste bulunalar. Yaltadaki «Hizb ut-Tahrir işi» boyunca qabaatlanğanlarnıñ ilk dörtü 2016 senesi fevralniñ 11-nde tevqif etildi. Bular: İnsan aqları boyunca alâqa grubunıñ azası Emir-Useyin Kuku, qurucılar olıp çalışqan Aluşta sakini Muslim Aliyev ile Qızıltaş köyüniñ sakini Enver Bekirov, ve Yaltada yaşağan çiçek satıcısı Vadim Siruk.
Rusiye FSB tahqiqatçıları Yaltadaki «Hizb ut-Tahrir işi»niñ figurantlarını, Qırım yarımadasında şeriyat mahkemesini (İslâm qanunları boyunca faaliyet köstergen mahkeme – QA) meydanğa ketirgenler dep saya, bildire Qırım jurnalisti Şevket Namatullayev.
Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirilmesinde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq kösterilgen 15 birleşmeniñ cedveline kirsetip, yasaq etti.
Qırımda Rusiyeniñ ilhaqından soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde ketken sayın daa sıq surette tintüvler yapıla.
