Link açıqlığı

Saatnıñ esas haberi

«Qırım federal universiteti»niñ talebelerini Rusiyeniñ «Yunarmiya»sına celp ettiler


Aqyar mekteplileri ile «Qırım federal universiteti» şubesiniñ talebeleri «Moskva» raketalı kreyseriniñ kögertesinde Rusiyeniñ «Yunarmiya» («Genç ordu») areketine aza qabul etildiler.

Bunı Rusiyege tabi Aqyar akimiyetiniñ matbuat hizmeti bildire.

«Gençler tantanalı muitte Rusiye mektepliler areketi faaliyetçisiniñ sözüni berdi ve «Yunarmiya» azasınıñ antını içtiler», – denile bildirüvde.

Bildirüvde, arbiy tehnika muzeyinde «Yunarmiya» azalarına 3D trenajorında özlerini gemi kapitanı ve arbiy helikopter pilotı sıfatında sınamağa imkân berildi, denile.

Qomşu Rusiyeniñ mudafaa nazirligi Kremlniñ kontroli altında bulunğan Qırım akimiyet organlarınen birlikte yarımadada «Yunarmiya» Rusiye arbiy-patriotik areketiniñ şubesini meydanğa ketirdi.

Aqyarda «Yunarmiya»ğa 55 umumiy orta mektepler, cemiyet bala ve sport teşkilâtları celp etildi.

Ukraina aq-uquq qoruyıcıları ilhaq etilgen Qırımda balalarnıñ terbiyelev formatınıñ arbiyleştirilgenine defalarca diqqat çektiler. Ruhiyatçılar zemaneviy Rusiyeniñ tasilinde balalarnıñ şuurına tazyıq etilgenini qayd eteler.

2015 senesiniñ başında Rusiyeniñ Qırım akimiyeti yarımadada «federal universitet»niñ meydanğa ketirilmesini buyurdı. Oña bir qaç aliy oquv yurtu ve bu cümleden yoq etilgen Vernadskiy adına Tavriya milliy universiteti, Georgiyevskiy adına Qırım devlet tıbbiyet universiteti ve bir qaç diger ilmiy muessise kirdi. «Qırım federal universiteti»niñ strukturasına 13 umum tasil ve ilmiy muessise kire.

Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG