Qomşu Rusiyeniñ Qara deñiz flotu komandanı Aleksandr Vitko, 2014 senesinden başlap, Moskva «Aq ve Qara deñizlerde vazifeler becermek maqsadınen» 50-den ziyade yañı arbiy gemi, kater ve yardımcı gemiler yolladı, dep bildire.
Bunı o, tünevin «İnterfaks» haber agentligine bergen intervyuda söyledi.
«Keçken üç yıl içinde bizge 50-den ziyade yañı arbiy gemi, kater ve yardımcı gemiler berildi. Olar iç bir azırlıqsız ve uzun bir işletüvge kirsetüv müddetini keçmeden vazifelerini becermege başladılar», – dep ketire Vitkonıñ sözlerini agentlik.
Onıñ aytqanına köre soñki bir yıl içinde flotnıñ arbiy ve yardımcı gemileri 20-den ziyade deñiz seferi ile üç flotlar arası sefer yaptılar.
«Qara deñizge kelgende, mında zemaneviy gemilerge qarşı «Bastion» sail raketa kompleksleri, Qırımda yerleştirilgen S-400 avadan ucumğa qarşı raketa kompleksleri, em de flotnıñ ava quvetleri ile avadan ucumğa qarşı mudafaa uçaqları bölgede çeşitli telükelerden emniyetni temin etmekniñ mantıqiy zıncırını tamamlaylar», – dedi Vitko «İnterfaks»qa.
Rusiye 2014 senesinde Qırımnı ilhaq etken soñ yarımadada er yıl arbiy talimler yaptıra. Ukrainanıñ Baş ştabında, Rusiye tarafından ilhaq etilgen Qırımda yaptırılğan arbiy talimlerge qanunsız deyler.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
