İlhaq etilgen Qırımda mekteplerniñ yarısından ziyadesi Rusiye tasil programları boyunca akkreditatsiyanı keçti. Bunı Qırım.Aqiqatqa Qırım insan aqları boyunca alâqa grubunıñ koordinatorı Abdureşit Cepparov bildirdi.
«60 mektepke nisbeten, ilân etilgen tasil programları boyunca tasil faaliyetleriniñ akkreditatsiyası işleri yapıla. Qalğan 173 umumiy tasil muessisesi 2017-2018 yılları içün tasil faaliyetiniñ akkreditatsiyası boyunca perspektiv planğa kirsetildi», – dep bildirdi o.
Cepparovnıñ malümatına köre, Qırımda bütün umumiy tasil muessiseleri Rusiye devlet akkreditatsiyasını 2018 senesi sentâbrniñ 1-ne qadar keçmek borclular.
Ukraina aq-uquq qoruyıcıları ilhaq etilgen Qırımda balalarnıñ terbiyelev şekliniñ arbiyleştirilgenine defalarca diqqat çektiler. Ruhiyatçılar zemaneviy Rusiyeniñ tasilinde balalarnıñ şuurına tazyıq etilgenini qayd eteler.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
