Link açıqlığı

İş grubu Ukraina Anayasasına Qırım boyunca deñişmelerniñ azırlanmasını bitirdi – Çubarov


Qırımtatar Milliy Meclisi reisi Refat Çubarov Kyivde matbuat konferentsiyasında, 2017 senesi noyabr 30 künü

Anayasa komissiyasınıñ alt iş grubu Ukraina Anayasasınıñ Qırım Muhtar Cumhuriyeti aqqında 10-ncı bölügi içün deñişmeler ve ilâvelerniñ azırlanmasını bitirdi. Bunı noyabrniñ 30-nda «Ukrinform»da keçken matbuat konferentsiyasında Qırımtatar Milliy Meclisiniñ reisi Refat Çubarov bildirdi.

«Keçken afta Anayasa komissiyasınıñ alt iş grubu Ukraina Anayasasınıñ onuncı – Qırım Muhtar Cumhuriyeti bölügi içün deñişmeler ve ilâvelerniñ tam metnini azırlap bitirdi. Şimdi bu metin iş grubunıñ azaları olğan Anayasa komissiyasınıñ 25 azası ile davet etilgen mutehassıslarğa yollana, ve ondan soñ biz onıñ dekabr ayında Anayasa komissiyasınıñ muzakeresine çıqarılacağını planlaştıramız», – dep bildirdi Çubarov.

Çubarovnıñ aytqanına köre, azırlanğan metinde «Qırımtatar halqınıñ meclisini şekillendirgen Qırımtatar halqınıñ qurultayı, qırımtatar halqınıñ yuqarı temsiliy organı» olğanını bildirgen norma bar.

Bıltır Ukraina prezidenti Petro Poroşenko Ukraina Anayasasınıñ Qırım Muhtar Cumhuriyeti aqqındaki 10-ncı bölügine deñişmeler ve ilâveler kirsetilmesi işini başlamaq kerek olğanını söyledi.

2017 senesi mayısnıñ 11-nde Ukrainanıñ Anayasa komissiyası, Ukraina Anayasasınıñ Qırım Muhtar Cumhuriyetine dair qısmı içün deñişmeler ve ilâveler işlep çıqacaq iş grubunı meydanğa ketirmege qarar berdi.

Qırımtatar halqınıñ sürgünligi qurbanlarını hatırlav künü munasebetinen keçirilgen tedbirler esnasında Poroşenko,Qırımda kelecekteki qırımtatar milliy muhtariyeti diger milletlerniñ aqlarını temin etecek, dedi.

Qırımtatar muhtariyetiniñ «separatizmge iç bir alâqası yoq». Onıñ meydanğa ketirilmesi, BMTniñ tamır halqlarınıñ aqları boyunca Beyannamesinde tayin etilgen tamır halqınıñ aqqıdır. Ukraina bu beyannamege 2014 senesinde qoşuldı, dep añlattı Ukraina informatsion siyaseti naziriniñ birinci muavini Emine Ceppar.

XS
SM
MD
LG